काठमाडौं । सार्वजनिक यातायात केन्द्रीय महासंघ नेपालको पदस्थापन तथा सपथग्रहण शनिबार सम्पन्न भएको छ । यातायात व्यवसायी डोलनाथ खनालको नेतृत्वमा गत जेठमा पुनर्गठन गरिएको महासंघको नेतृत्वको पदस्थापन गराइएको हो ।
महासंघको प्रमुख संरक्षकमा होमप्रसाद अधिकारी, सहअध्यक्षमा किरणकुमार रिजाल, वरिष्ठ उपाध्यक्षमा भरत तिमिल्सिना, हेमेन्द्र शेरचन, निरकुमार कार्की रहेका छन् । उपाध्यक्षमा मिनबहादुर मानन्धर, कान्छाराम थिङ, दिवाकर पौडेल, पुष्पधन शाक्य, नवराज सिंह, गणेशलाल श्रेष्ठ, सरोज खनाल रहेका छन् ।
महासचिवमा भरत नेपाल, उपमहासचिवमा कुमार थापा, रामहरि श्रेष्ठ, केशव नेपाल छन् भने सचिवमा लबकुमार केसी, महेश्वर महर्जन, अरुण श्रेष्ठ, गान्धीराज गिरी, आत्मराम थापा रहेका छन् । कोषाध्यक्षमा धर्मराज रिमाल, सहकोषाध्यक्ष भुवन बराल, ज्ञानेन्द्र कुमार श्रेष्ठ छन् । वरिष्ठ व्यवसायीमा केशवप्रसाद अधिकारी र मधुसुधन अधिकारीसहित ९ वटा वर्गीय संयोजकसहितको १ सय १ जनाको समितिको पदस्थापन गराइएको अध्यक्ष खनालले आर्थिक आवाजलाई जानकारी दिए ।
बागमती प्रदेश कमिटिको अध्यक्षमा चिनीबहादुर बोहरा र काठमाडौं उपत्यका विशेष प्रदेश कमिटि अध्यक्षमा दीपक राना रहेका छन् । महासंघको सल्लाहकारमा सोमप्रसाद तुलाचन, रामप्रसाद भट्टराई, वसन्तबहादुर बस्नेत, के बि सम्राट र उत्तम भट्ट रहेको छन् । शनिबार एक कार्यक्रमबीच संरक्षक होमप्रसाद अधिकारीको प्रमुख आतिथ्यतामा कार्यक्रम भएको हो भने अधिवक्ता तथा निर्वाचन अधिकृत वसन्तबहादुर बस्नेतले सपथग्रहण तथा पदस्थापन गराएका हुन् ।
महासंघमा देशभर रहेका ३ सय ९७ कम्पनीहरु आबद्ध भइसकेका र ४० वटा कम्पनी आबद्ध हुने क्रममा रहेको उपाध्यक्ष भरत तिमिल्सिनाले जानकारी दिए ।
देशभर रहेका यातायात व्यवसायसँग सम्बन्धित कम्पनीलाई महासंघमा आबद्ध बनाउँदै व्यवसायको हितमा सरकारसँग समन्वय गर्ने अध्यक्ष खनालले प्रतिबद्धता व्यक्त गरेका छन् । नीति निर्माणमा परिवर्तन ल्याउने र व्यवसाय र व्यवसायीको संरक्षण गर्ने गरी काम गर्ने उनले बताए । ‘यातायात व्यवसायका सन्दर्भमा धेरै समस्याहरु छन्,’ उनले भने, ‘हामी व्यवसायी तथा कम्पनीहरुलाई महासंघमा आबद्ध गर्दै व्यावसायिक हितमा सक्रियताका साथ काम गर्नेछौं ।’
