आर्थिक आवाज
पोखरा, १२ माघ सहारा क्लब पोखराले फुटबल प्रतियोगिताको पुरस्कार राशि वृद्धि गरेको छ । १७ औं आहा रारा गोल्डकप फुटबल प्रतियोगिता विजेताले यसपालि ८ लाख १ हजार र उपविजेताले ४ लाख १ हजार रुपैयाँ नगद पुरस्कार जित्नेछन् । क्लबले शनिबार आयोजना गरेको पत्रकार सम्मेलनमा क्लब अध्यक्ष केशवबहादुर थापाले मोफसलको सबैभन्दा चर्चित सो फुटबल प्रतियोगितालाई अझ महत्व दिन पुरस्कार राशि वृद्धि गर्दैआएको जानकारी दिए । गत संस्करणमा विजेताले ७ लाख १ हजार र उपविजेताले ३ लाख ५१ हजार पाएका थिए ।
निर्माणाधीन पोखरा रंगशालामा अस्थायी प्यारापिट बनाएरै भए पनि प्रतियोगितालाई निरन्तरता दिँदै क्लबले विगतको साख जोगाइराख्ने पक्षमा छ । रंगशाला बाहेक अर्को विकल्प आफूहरुले नसोचेको क्लब अध्यक्ष थापाको भनाइ छ । यसपालिको संस्करण फागुन ९ देखि १८ सम्म तोकिएको छ । प्रतियोगितामा ए
डिभिजन क्लब, विभागीय, विदेशी र आयोजक टिमको सहभागिता हुनेछ । विदेशी टिमको छिनोफानो हुनेक्रममा रहेको आयोजकले जनाएको छ । विगतमा १२ दिनसम्म हुने प्रतियोगिताको मिति घटेर यसपालि १० दिन तय भए पनि विभिन्न ठाउँमा प्रतियोगिता भइरहेकोले टिम टुंगो लाग्ने बित्तिकै १२ दिनसम्म पनि हुन सक्ने आयोजकको अनुमान छ ।
हिमश्री फुड्स प्रालिको उत्पादन आहा तथा रारा तयारी चाउचाउको मुख्य प्रायोजनमा हुँदै आएको सो प्रतियोगिताबाट १ करोड ३० लाख आम्दानी हुने र खर्च कटाइ ३२ लाख २ हजार बचत गरिने क्लबको लक्ष्य रहेको महासचिव विश्वराज बरालले बताए । यस्तै एक जनालाई सर्वोत्कृष्ट राष्ट्रिय फुटबल खेलाडी सम्मानवापत ३५ हजार रुपैयाँ प्रदान गरिनेछ । सर्वाधिक गोलकर्ता, फेयर प्ले पुरस्कार सहित विधागत पुरस्कार समेत प्रदान गरिनेछ । प्रतियोगिताको ट्रफी, मेडल, म्यान अफ दी म्याचको पुरस्कार प्रायोजन सहारा यूकेले गरेको छ । सो ट्रफी सहारा युके महासचिव धनु थकालीले प्रतियोगिता मूलआयोजक समिति संयोजक एवं क्लब अध्यक्ष केशवबहादुर थापालाई हस्तान्तरण गरे ।
क्लब अध्यक्ष केशवबहादुर थापाको अध्यक्षतामा भएको कार्यक्रममा स्वागत प्रतियोगिता संयोजक हरेराम गुरुङ सुरज, महासचिव विश्वराज बराल, प्रचार संयोजक पत्रकार नारायण कार्की, तमु धिं युके अध्यक्ष नन्दजंग गुरुङ, सहारा युके महासचिव धनु थकाली लगायतले प्रतियोगिता सफल पार्न सबैले आ–आफ्नो ठाउँबाट सहयोग गर्नुपर्ने बताए ।
मोफसलको प्रतिष्ठित सहारा क्लब पोखराले पोखरा १७ दोबिल्लामा सहारा एकेडेमी संचालन गरी विपन्न तथा कठिन परिस्थितिका २८ जना बालकलाई फुटबल सिकाउँदै आवासीय सुविधा दिएको छ । प्रतियोगिताबाट बचत रकम सोही एकेडेमीमा सदुपयोग गर्दैआएको क्लबका पूर्व अध्यक्ष विक्रम थकालीले बताए । आहारारा १७ औं संस्करण भए पनि क्लबले सुरुवातमा क्याराभानसहित आयोजना गरेको यो १८ औं संस्करण हो
Comments are closed.