पोखरा । बालोदय माध्यमिक विद्यालय पोखरामा चित्रकला प्रतियोगिता सकिएको छ । विद्यालयको ३६ औँ स्थापना दिवसको अवसरमा विद्यालयमा स्थापित बालोदय आर्ट एण्ड क्राफ्ट क्लवको आयोजनामा जिल्लास्तरीय अन्तर विद्यालय चित्रकला प्रतियोगिता भएको हो ।
विद्यालयका प्रबन्ध निर्देशक दुर्गादत्त पगेनीको अध्यक्षतामा भएको कार्यक्रमका प्रमुख अतिथि पोखरा महानगरपालिका वडा नं १७ का वडाध्यक्ष राधिका कुमारी शाही रहेकी हुन् । वडाध्यक्ष शाहीले यस्ता खालका सिर्जनशील कार्यक्रमले विद्यार्थीहरुको अन्तरनिहित प्रतीभाको प्रस्फुटन हुने बताइन् ।
प्रतियोगिताका विजयी तथा सहभागी विद्यार्थीलाई प्रधानाध्यापक टेकनाथ पौडेलले बधाई तथा शुभकामना व्यक्त गरेका छन् । प्रतियोगितामा रिलायन्स पब्लिक स्कुलका छात्रा सृष्टि नेपाली प्रथम, सोही विद्यालयका छात्रा कृष्टिना गुरुङ द्वितीय, विभुती विद्या सदनका छात्रा इच्छा गुरुङ तृतीय र सबलाइम माविका रेजिना ढकालले सान्त्वना स्थान प्राप्त गर्न सफल भएका छन् ।
प्रतियोगितामा प्रथम, द्वितीय, तृत्तिय र सान्त्वना हुने विद्यार्थीलाई क्रमशः नगद रु। १० हजार, ५ हजार, ३ हजार र २ हजार साथमा ट्रफी एवम् प्रमाणपत्र विद्यालयको वार्षिकोत्सव तथा अभिभावक दिवसको अवसरमा पुरस्कृत गरिने कार्यक्रम संयोजक शिव सिर्पालीले जानकारी दिए । प्रतियोगितामा ४३ वटा विद्यालयका ७२ विद्यार्थीको सहभागिता रहेको विद्यालयले जनाएको छ ।
Comments are closed.