पोखरा । चौथो संस्करणको अन्नपूर्ण म्याराथनको उपाधि नेपाल आर्मीका होमलाल श्रेष्ठले जितेका छन् । गत वर्षका उपविजेता श्रेष्ठले निर्धारित ४२.१९५ किलोमिटरको दुरी ४ घण्टा १६ मिनेट २४ सेकेण्डमा पुरा गर्दै नगद १ लाख ५० हजार रुपैयाँ पुरस्कार प्राप्त गरे ।
उनले उक्त दुरी ४ घण्टा १२ मिनेट ५१ सेकेन्डमा पार गरेका थिए । त्यसैगरी सोलुखुम्बुका अर्जुङ कुलुङ दोस्रो भए । उनले निर्धारित दुरी ४ घण्टा ३५ मिनेट १५ सेकेण्डमा पुरा गरेका गरे । उनी ५ दिन अघि मात्र एभरेस्ट म्याराथनको उपाधि चुमेर लगत्तै अन्नपूर्ण म्याराथनमा सहभागी भएका थिए ।
त्यसैगरी गतवर्षका विजेता जुम्लाका धिरबहादुर बुढा तेस्रो स्थानमा परे । उनले ४ घण्टा ४३ मिनेट ६ सेकेण्डको समयमा निर्धारित दुरी पार गरेका थिए भने उनले गत बर्ष उक्त दुरी ४ घण्टा १० मिनेट ५१ सेकेन्डमा पार गरी प्रथम स्थान प्राप्त गरेका थिए । द्वितीय र तृत्तिय स्थान प्राप्त गरेका राई र बुढ़ाले क्रमशः एक लाख र ७५ हजार नगद प्राप्त गरे ।
महिलातर्फ खोटाङकी राई प्रथम
महिलातर्फको उपाधि खोटाङका निर्मला राईले जितेकी छन् । उनले निर्धारित दुरी ५ घण्टा ३७ मिनेट ४७ सेकेण्डमा पुरा गरी राईले नगद १ लाख ५० हजार राशी पुरस्कार प्राप्त गरिन् । नेपाल आर्मीकी (डोल्पा घर भएकी) सुनसरी रोकायले ५ घण्टा ४५ मिनेट ३१ सेकेण्डमा दौड़ पुरा गर्दै दोस्रो स्थानामा रहिन भने ओखलढुङ्गाकी छोकी शर्पाले ५ घण्टा ५६ मिनेट ५९ सेकेण्डको समय दुरी पार गर्दै तेस्रो स्थान हासिल गर्न सफल बनेकीछिन् ।
गत बर्ष पनि तेस्रो स्थान प्राप्त गरेकी शर्पाले ६ घण्टा ११ मिनेट १६ सेकेण्डमा दौड पुरा गरेकी थिईन् । महिलातर्फ पनि द्वितीय र तृतीय स्थान प्राप्त गरेका रोकाय र शर्पाले क्रमशः एक लाख र ७५ हजार प्राप्त गरे । दौड ४ हजार १ सय ३० मिटरको अन्नपूर्ण आधार शिविरबाट शुरु भई माछापुच्छ्रे आधारशिविर, बगर, देउराली, हिमालय, दोभान, सिनुवा, भनुवा, छोम्रोङ, तउलु, घुर्जुङ, चुइँले, कोम्रोङडाँडा, किम्रोङखोला उरी हुँदै घान्द्रुक ओर्लिएर समापन भएको हो ।
महिलातर्फ १ विदेशी सहित ११ जना धाविका र ३ विदेशी ४९ जना पुरुष धावक सहभागी थिए । महिला तथा पुरुष गरी ६० जना धावकले भाग लिएकोमा २ जनाले बीचबाटै प्रतियोगिता छाडेका थिए । ४ विदेशीमध्ये ३ जना बेलायती र १ स्क्टल्यान्डका धावक सहभागी रहेको बताइएको छ ।
अन्नपूर्ण सेन्चुरी पर्यटन समितिको आयोजनामा सञ्चालित अन्नपूर्ण म्याराथनमा विजेता धावकलाई म्याराथनका समापन समारोहका प्रमुख अतिथी गण्डकी प्रदेश सरकारका आर्थिक मामलामन्त्री डा. टकराज गुरूङ, मूल आयोजक समितिका संयोजक एवं समितिका अध्यक्ष ललित गुरूङ लगायतका विभिन्न व्यक्तित्वले पुरस्कार प्रदान गरेका हुन् ।
कार्यक्रममा बोल्दै प्रमुख अतिथी गुरूङले पर्यटन पूर्वाधारको विकास गर्नका लागि मौलिकतालाई जोगाई संरक्षणमा जोड दिनुपर्ने बताए । उनले अन्नपूर्णको पर्यटन पर्वधन गर्नका लागि गण्डकी प्रदेश सरकारले उचित नीति निर्माण गर्ने जानकारी दिए । अर्थ पर्यटनको विकास र विस्तार गर्न सके रोजÞगारी सिर्जना र उत्पादनमा मद्धत पुग्ने उनको भनाई छ ।
‘पर्यटनका लागि सबै मौसम’ भन्ने नारासहित अन्नपूर्ण पदयात्रा क्षेत्रको विकास र विस्तारमा टेवा पु¥याउने उद्देश्यसहित समितिले २०७५ सालदेखि अन्नपूर्ण म्याराथन आयोजना गर्दै आएको छ । अन्नपूर्ण म्याराथनलाई अन्तर्राष्ट्रिय इभेन्टका रुपमा विकास गर्न गत वर्षदेखि अल्टिमेट एडभान्चर नेपालको साथ र सहयोग रहेको समितिले जनाएको छ ।
सन् १९५० जुन ३ तारिखका दिन फ्रान्सेली पर्वतारोही मौरिस हर्जोगको टोलीले अन्नपूर्ण प्रथम हिमालको सफल आरोहण गरी ८ हजार मिटरभन्दा अग्ला हिमाल आरोहणको इतिहासमा विश्व कीर्तिमानी राखेको दिनलाई “अन्नपूर्ण आरोहण दिवस” मनाउने गरिन्छ । सोही दिनको सम्झनामा ‘अन्नपूर्ण म्याराथन’ आयोजना गरिएको अन्नपूर्ण म्याराथन प्रतियोगिताका संयोजक ललित गुरुङले बताए ।
समितिका अध्यक्ष गुरूङको अध्यक्षतामा कार्यक्रम भएको हो । कार्यक्रममा पण्डित गुरू आनन्द, प्रदेश सभा सदस्य प्रकाश बराल, पूर्वमन्त्री प्रकाश गुरूङ, नेपाल टुरिजम बोर्डका सदस्य ऋषिराम भण्डारी, अन्नपूर्ण संरक्षण क्षेत्र आयोजना पोखराका प्रमुख डा. रविन कडायत लगायत सहभागी थिए ।
Comments are closed.