गोदावरी (कैलाली) । जिल्लामा सञ्चालित २८९ घरेलु तथा साना उद्योग बन्द भएका छन् । कच्चापदार्थ अभाव, उत्पादित सामग्रीले बजार मूल्यसँग प्रतिस्पर्धा गर्न नसक्नु लगायतका कारण ती उद्योग बन्द भएको घरेलु तथा साना उद्योग कार्यालयले जनाएको छ ।
कतिपय उद्योग सञ्चालक रोजगारीका लागि वैदेशिक रोजगारीमा गएको देखिएको छ । कार्यालयका लेखा अधिकृत टिकेन्द्रप्रसाद जोशीले खाने तेल, सिमेन्ट ब्लक, पोल्ट्रीफार्म, ब्युटीपार्लर जस्ता घरेलु उद्योग बन्द भई खारेजीमा परेको जानकारी दिए । पछिल्लो समय उद्योग दर्तामा महिलाको स्वामित्व उल्लेख्य रुपमा बढ्दै गएको छ । महिलाका नाममा प्राइभेट फार्म दर्तामा छूटको व्यवस्था गरिएसँगै उद्योग दर्तामा महिलाको स्वामित्व बढेको हो ।
१ करोड सम्मको कुल पूँजी भएका निजी फार्म महिलाका नाममा दर्ता गर्दा शुल्कमा छुटको कानुनी व्यवस्था गरिँदा उद्योगमा महिलाको स्वामित्व उल्लेख्य रुपमा बढेको जोशीले बताए । कैलालीमा हालसम्म १५ हजार ४८६ उद्योग दर्ता छन् ।
उद्योग कार्यालयमा अहिलेसम्म उत्पादनमूलक ३ हजार २०८, कृषिसम्बन्धी ६ हजार ५१४, निर्माणसम्बन्धी २, पर्यटनमूलक ६५, सूचना प्रविधिमूलक १२, सेवामूलक ५ हजार ६८५ गरी १५ हजार ४८३ उद्योग दर्ता भएका छन् । अहिलेसम्म दर्ता भएका उद्योगमा २५ अर्ब ७० करोड ३७ लाख लगानी प्रस्ताव गरिएको छ । ती उद्योगमा ९ हजार २११ महिला र ६९ हजार ६५७ पुरुषलाई रोजगारी प्रस्ताव गरिएको जनाइएको छ ।
गत आव २०८०/८१ मा उत्पादनमूलक १३५, कृषिमूलक ३२३, सेवामूलक दुई सय ५६ गरी जम्मा ७१४ उद्योग दर्ता भएको लेखा अधिकृत जोशीले बताएका छन् । गत आवमा १ करोड ७७ लाख ४४ हजार ७७७ राजस्व सङ्कलन भएको छ । अघिल्लो आव २०७९/०८० मा ११ सय ९७ उद्योग दर्ता भएकामा कार्यालयले ५२ लाख १६ हजार राजस्व सङ्कलन गरेको थियो ।
अघिल्ला आवभन्दा गत आव २०८०/८१ मा उद्योग दर्तामा कमी आएको छ । लेखा अधिकृत जोशीले अघिल्लो आवको तुलनामा गत आव २०८०/८१ मा करको दर बढेसँगै वाणिज्य कार्यालयले दर्ता गर्ने पसललगायतका काम गत आवदेखि घरेलु तथा साना उद्योग कार्यालयले गर्दा राजस्व सङ्कलनमा वृद्धि भएको बताए । रासस
Comments are closed.