काठमाडौं । काठमाडौंको भृकुटीमण्डपमा ८ औँ संस्करणको रुपमा ‘चेम्बर अफ एक्स्पो’ चलिरहेको छ । नेपाल चेम्बर अफ कर्मसको आयोजनामा बिहिवारदेखि सुरु भएको एक्स्पोले सरकार प्रमुख, उच्च पदस्थ व्यक्ति, विभिन्न संघ संस्थाका प्रमुख, प्रतिनिधि, उद्योगी, व्यवसायी, दर्शक तथा सरोकारवालाको ध्यान तानिरहेको छ ।
पहिलो दिन र दोस्रो दिन दर्शकको सहभागीता उत्साहजनक रहेको चेम्बर अफ कमर्सका अध्यक्ष कमलेशकुमार अग्रवालले बताए ।एक्स्पोमार्फत स्थानीय उत्पादनको प्रवद्र्धन एवं बजारीकरण तथा व्यापार अभिवृद्धि गर्ने उद्देश्य रहेको अध्यक्ष अग्रवालले जनाएका छन् ।
“मुलुकभित्र आयोजना हुने अन्तर्राष्ट्रियस्तरका व्यापार मेला तथा प्रदर्शनीले नविनतम् प्रविधि, उत्पादन, उपभोक्ताको चाहना एवं बजारीकरणबारे प्रत्यक्ष अवलोकन गर्न सकिने अवसर प्रदान गरेका हुन्छन,” अध्यक्ष अग्रवालले भने, “मुलुकभित्र यस्ता आर्थिक क्रियाकलापको विस्तारले वाह्य व्यापारिक समुदायसँग सहकार्य भई स्वदेशी उद्यमी तथा व्यवसायीमा प्रतिस्पर्धात्मक क्षमता अभिवृद्धि हुन्छ ।”
उनका अनुसार एक्स्पोमा यस वर्ष अन्तर्राष्ट्रियस्तरको ‘सफ्टवयर’ र ‘एआई’ परियोजना आर्कषणको केन्द्रको रुपमा रहेका छन् । मुलुकमा अन्तर्राष्ट्रियस्तरको प्रर्दशनी कक्ष निर्माण गर्न अविलम्व पहल गरिनुपर्ने र यसका लागि सरकारसँग सहकार्य गर्न नेपाल चेम्बर अफ कमर्स सदैव तयार रहेको उनले बताए ।
यस वर्ष पनि एक्स्पोमा कृषिजन्य वस्तु, हस्तकला, लत्ता कपडाका सामान, अटोमोबाइल, इलेक्ट्रोनिक्स, घरेलु उपकरण, कपडा, फर्निचर, गार्मेन्ट, छालाका सामान, गहनाका सामान, सौन्दर्य प्रसोधन सामग्रीलगायतको प्रदर्शनी आगन्तुकका लागि आकर्षणको केन्द्र बन्न सक्ने विश्वास गरिएको नेपाल चेम्बर अफ कमर्स मेला समिति सभापति राष्ट्रभुषण चाकुबजीले बताए ।
एक्स्पोमा नेपाल, बङ्गलादेश, भारत, चीन, थाइल्याण्ड, युएई, दक्षिण कोरिया, मलेसिया, पाकिस्तानलगायतका व्यवसायीले उक्त देशमा उत्पादित वस्तुसहित सहभागिता जनाएको उनी बताउँछन् । उनका अनुसार यहाँ ५ दिनसम्म चल्ने एक्स्पो कम्तिमा ५० हजार दर्शकले अवलोकन गर्ने अनुमान गरिएको छ । स्वदेशी र विदेशी गरी १२५ भन्दा बढी स्टल रहेको छ । एक्स्पो यही माघ २१ गतेसम्म चल्नेछ ।
‘चेम्बर अफ एक्स्पो’ को विहिवार प्रधानमन्त्री केपी शर्मा ओलीले उद्घाटन गरेका हुन् । उनले एक्स्पोको अवलोकन गर्दै ठुलो मात्रामा उत्पादन गरेर छिमेकी भारत र चीनलगायत अन्तर्राष्ट्रिय बजारमा निर्यात बढाउने अवस्था सृजना गर्न उद्योगी–व्यवसायीलाई आग्रह गरेका छन् ।
Comments are closed.