स्थल यातायात तथा पारवहन समिति नेपाल उद्योग वाणिज्य महासंघ अन्तर्गतको पूरानो र सक्रिय समिति हो । यो समितिले यातायात नीति निर्माणमा पहल गर्ने, यो क्षेत्रका समस्या तथा चुनौतिहरुको पहिचान गर्ने, समाधानका उपायहरु खोज्ने काम गरिरहेको छ । ढुवानी लागत घटाउने उपायहरुको खोजीदेखि अन्य समसामयिक विषयमा छलफल तथा बहस गर्दै आइरहेको छ । नेपालको समग्र विकासमा यातायात र पारवहन क्षेत्रको महत्वपूर्ण भूमिका छ । यसका लागि हामीले पारबहनलाई व्यवस्थित बनाउनुपर्छ ।
हालै, स्थल यातायात तथा पारवहन समितिले बंगलादेश, भारत र नेपाल (बिआइएन) लाई जोड्ने पारवहन नीतिमा महत्वपूर्ण पहल गरेको छ । तीनवटै देशका यातायात क्षेत्रका कानुन फरक भएता पनि, समिति यसलाई मर्ज गरेर एकीकृत प्रणालीको माध्यमबाट पारवहनमा सहयोग पु¥याउने अभियानमा सक्रिय छ । यस अभियानमा विश्व बैंक, युनडिपी र युएसआइडीजस्ता अन्तर्राष्ट्रिय संस्था समेत सहभागी छन् । परराष्ट्र मन्त्रालयको नेतृत्वमा चलिरहेको यो अभियानले तीन देशका बीचमा सहयोग र समन्वयलाई सुदृढ बनाउने कार्य गर्दैछ । हामीले आफ्नो ठाउँबाट यो अभियान सफल बनाउन सक्रिय योगदान गरिरहेका छौं ।
तीन देशको सहयोगमा एकीकृत पारवहन प्रणालीको निर्माणले नेपाललाई आर्थिक समृद्धिको मार्गमा अघि बढाउन मद्दत गर्ने विश्वास गर्न सकिन्छ । नेपालको यातायात क्षेत्रको प्रमुख चुनौती ढुवानी खर्चको उच्च लागत हो । नेपालमा सामानको आयात र निर्यातका लागि ढुवानी खर्च अत्यधिक हुने समस्याले उत्पादन लागत बढाउँछ । लागत बढी हुँदा नेपालको प्रतिस्पर्धात्मक क्षमता कमजोर बनिरहेको छ । यस्ता समस्याहरुको समाधानका लागि समितिले विभिन्न प्रयासहरु गर्दै आएको छ ।
समितिले सरकार र निजी क्षेत्रलाई एकै स्थानमा ल्याएर पारवहन नीतिहरु र त्यससँग सम्बन्धित समस्याहरुको बारेमा छलफल र सुझाव दिने काम गरिरहेको छ । यातायात तथा पारबहन समस्याको पहिचानसँगै ती समस्या समाधानका उपायहरु पनि सुझाउँदै आएका छौं । ढुवानी खर्च कसरी घटाउन सकिन्छ भन्ने विषयमा निरन्तर छलफल र बहस भइरहेका छन् । पारवहन प्रणालीमा तत्काल सुधार ल्याउनुपर्ने आवश्यकता महसुस भएको छ । यसका लागि सरकार र निजी क्षेत्रको समन्वय र आपसी समझदारी आवश्यक छ । यस्ता सुधारहरुले नेपालको आन्तरिक तथा अन्तर्राष्ट्रिय व्यापारलाई प्रोत्साहन गर्नेछन् र अन्ततः आर्थिक विकासमा मद्दत पु¥याउनेछन् ।
नेपालको सडक पूर्वाधारको सुधार र प्रभावकारी यातायात नीतिहरु अवलम्बन गर्नका लागि सरकार र निजी क्षेत्रका बीचमा सहकार्य महत्वपूर्ण छ । नेपाल उद्योग वाणिज्य महासंघले सरकार र निजी क्षेत्रलाई जोड्ने कार्य गर्दै आएको छ । नीति निर्माण र कार्यान्वयनमा सहकार्यको वातावरण सिर्जना भएको छ । तर, जति हुनुपर्ने त्यति भने हुन सकेको छैन । महासंघले थप रचनात्मक र उपलब्धीपूर्ण काम गर्नुपर्ने आवश्यकता छ ।
Comments are closed.