काठमाडौं । नेपाल एसोसिएसन फर सफ्टवेयर एन्ड आईटी सर्भिसेज कम्पनीज (नास आईटी) ले आफ्नो आधिकारिक साइबर सुरक्षा समिति गठन गरेको छ ।
नेपालको डिजिटल क्षेत्रलाई उच्च स्तरको सुरक्षित, सुदृढ र भविष्यका लागि तयार बनाउन सहयोग पुर्याउने उद्देश्यले साइबर सुरक्षा समिति गठन गरिएको हो । नास आईटी साइबर सुरक्षा समिति सदस्यमा विजय लिम्बु सेनिहाङ, घनश्याम ओली, प्रज्वल गौतम, रोशन पोखरेल, सम्पन्न श्रेष्ठ रहेका छन् । अभय पौडेल, दिपेन चापागाईं, नारायण कोइरालालाई सल्लाहकारमा चयन गरिएको छ ।
समितिमा साइबर सुरक्षा विज्ञ र नास आईटी सदस्य कम्पनीका प्रतिनिधि आबद्ध सामूहिक लक्ष्य नेपालमा साइबर सुरक्षालाई सुधार गर्नु हो । नास आईटी बोर्ड अन्तर्गत सञ्चालन हुने यो समितिले निजी क्षेत्र र बृहत् प्राविधिक समुदायभित्र व्यावहारिक र महत्त्वपूर्ण गतिविधिको नेतृत्व गर्नेछ ।
नेपालको सूचना प्रविधि (आईटी) र सफ्टवेयर उद्योगलाई सुरक्षित, सुदृढ र विश्वसनीय बनाएर देशको डिजिटल प्रणाली र तथ्याङ्कको सुरक्षा गर्दै विश्वव्यापी बजारमा विकास गर्न सक्ने बनाउनु नै साइबर सुरक्षा समितिको अवधारणा रहेको छ । ज्ञानको आदानप्रदान, उपयोगी नीतिको निर्माण र उद्योग, विश्वविद्यालय, सरकार र अन्य समूहबीच सहकार्यको वातावरण निर्माण गरेर उपयोगी साइबर सुरक्षा कार्यको नेतृत्व गर्नु नै साइबर सुरक्षा समितिको मिसन रहेको जनाइएको छ ।
प्राविधिक र रणनीतिक निर्णयलाई मार्गदर्शन गर्न शीर्ष पेशेवरको ज्ञान प्रयोग गर्ने, स्पष्ट, उपयोगी, र प्रभावी साइबर सुरक्षा नियम र कानूनहरू को विकासलाई समर्थन गर्ने, निजी कम्पनी, सरकारी निकाय, विश्वविद्यालय र अन्य समूहबीच सामूहिक कार्यलाई सुधार गर्ने र साइबर सुरक्षा बारे थप सिक्न मानिसलाई मद्दत गर्न कार्यक्रम, तालिम र अनुसन्धान कार्यहरू आयोजना गर्ने समितिको मुख्य उद्धेश्यहरु रहेका छन् ।
अन्तर्क्रिया, रचनात्मक विचार र सामूहिक पहलका लागि यो समिति एउटा माध्यमको रूपमा काम गर्नेछ । यसले नेपालको साइबर सुरक्षा प्रयासलाई विश्वव्यापी मापदण्डसँग मिलाउन र भविष्यका आवश्यकता र चुनौतीका लागि उद्योगलाई तयार पार्न मद्दत पुग्नेछ ।
Comments are closed.