काठमाडौं । एनआईसी एशिया बैंक र नेपाल क्लियरिङ हाउस लिमिटेड (एनसीएचएल) बीच सम्झौता भएको छ । विश्वका विभिन्न देशबाट नेपालमा आएका अलीपे नेटवर्क प्रयोग गर्ने पर्यटकले नेपालपे क्युआर मर्चेन्टमा सोझै भुक्तानी गर्न सक्ने गरी सम्झौता सम्पन्न भएको छ ।
यस सम्झौतापछि भुक्तानी प्रणाली सेवा प्रदायक अलीपेमा जोडिएका ११ भन्दा धेरै मुलुकका नागरिक नेपाल आउँदा आफ्नो देशको वालेट वा बैंकिङ एप मार्फत यस बैंकले उपलब्ध गराएको नेपालपे क्युआर मर्चेन्टमा सोझै भुक्तानी गर्न सक्ने सुविधा उपलब्ध भएको छ ।
सम्झौता पत्रमा यस बैंकका सहायक प्रमुख कार्यकारी अधिकृत जयन्द्र रावल र नेपाल क्लियरिङ हाउसका प्रमुख कार्यकारी अधिकृत नीलेशमान सिंह प्रधानले हस्ताक्षर गरेका छन् । अलिपे नेटवर्कमा हाल चीन, हङकङ, सिंगापुर, मलेसिया, फिलिपिन्स, मंगोलिया, थाइल्याण्ड, दक्षिण कोरिया, इटाली, मकाओ, जर्मनी लगायतका देशका विभिन्न बैंक तथा भुक्तानी प्रदायकहरु आवद्ध रहेका छन् ।
यस सम्झौतापछि यस बैंकमा जोडिएका मर्चेन्टले अलिपे नेटवर्कमा जोडिएका मुलुकका पर्यटकले नेपालपे क्युआरमार्फत गर्ने भुक्तानी सहजै प्राप्त गर्न सक्नेछन् । बैंक र एनसीएचएलबीच भएको यस सम्झौताले मुलुकको अन्तरदेशीय क्युआर भुक्तानीमा समेत प्रवद्र्धन गरी नेपालमा आउने पर्यटकका लागि सहजै भुक्तानी गर्ने सेवा उपलब्ध गराएको छ ।
Comments are closed.