नेपाल हेभी इक्विमेन्ट व्यवसायी महासंघले सातै प्रदेश तथा जिल्ला संघहरुको भेला तथा अधिवेशन गर्ने तयारी गरेको छ । यसैक्रममा गण्डकी प्रदेशस्तरीय भेला तथा अधिवेशन एवं महासंघ केन्द्रीय कमिटिको चौथो पूर्ण बैठक आज पर्यटकीय नगरी पोखरामा हुँदैछ । यसैक्रममा महासंघका अध्यक्ष उमाकान्त शर्मासँग गरिएको कुराकानीः
भदौ २ गते पोखरामा गण्डकी प्रदेशस्तरीय भेला तथा अधिवेशन एवं केन्द्रीय कमिटिको चौथो पूर्ण बैठक हुँदैछ । यो कार्यक्रमको महत्व कस्तो छ ?
यो भेला हाम्रो महासंघको लागि निकै महत्वपूर्ण छ । गण्डकी प्रदेशका व्यवसायीलाई एक स्थानमा भेला गरेर आपसी अनुभव आदान–प्रदान, समस्या र समाधानबारे प्रत्यक्ष छलफल गर्ने अवसर हुनेछ । सोही अवससरमा हामीले विचार गोष्ठी पनि पनि आयोजना गरेका छौं । यसैसँगै केन्द्रीय कमिटिको चौथो पूर्ण बैठक पनि हुनेछ, जसले आगामी कार्ययोजना र नीति तय गर्नेछ । पोखरा जस्तो पर्यटकीय शहरमा कार्यक्रम हुनु स्वयं एक प्रेरणादायी कुरा हो, किनकि यसले प्रदेश र राष्ट्रिय दुवै तहमा हाम्रो उपस्थिति मजबुत बनाउँछ ।
भेलालाई सफल बनाउन के–कस्ता तयारीहरू भइरहेको छ ?
केन्द्र, प्रदेश र कास्कीसहितका जिल्लास्तरीय सबै संरचनाले संयुक्त तयारी गरिरहेका छन् । स्थान चयन, कार्यक्रम व्यवस्थापन, सहभागी व्यवसायीहरूको सहजताका लागि बसोबास, यातायातको व्यवस्था र छलफलका विषयहरूमा पूर्व तयारी भएका छन् । आवश्यक सबै तयारीमा हामीले विशेष ध्यान दिएका छौं । हामी चाहन्छौं कि पोखराको कार्यक्रममा सहभागी भएर फर्कने प्रत्येक व्यवसायीले यहाँबाट उपयोगी ज्ञान र व्यावहारिक समाधान बोकेर घर फर्कनेछन् ।
हाल महासंघको प्राथमिक कार्यसूचीमा के–के विषय छन् ?
व्यवसायीहरूको हकहितको सुरक्षा, उपकरणको दिगो प्रयोग र भाडा प्रणालीलाई व्यवस्थित बनाउने र करसम्बन्धी अन्यायपूर्ण दबाब हटाउने हाम्रो प्राथमिकतामा छन् । पोखराको भेलामा यी विषयहरूमा ठोस निर्णय निकाल्ने छौं । साथै, जिल्लास्तरीय संगठन विस्तारलाई तीव्रता दिने योजना पनि यो बैठकबाट टुंगो लगाइनेछ ।
हेभी इक्विपमेन्ट व्यवसायमा देखिएका समस्याहरू यस भेलामा कसरी सम्बोधन हुनेछ ?
समस्या त धेरै छन् । कामको कमी, उपकरणको सुरक्षा, अनावश्यक करभार, भाडा रकम उठाउनको कठिनाइ र ट्राफिक नियम सम्बन्धी अवरोध लगायत धेरै समस्या छन् । भेलामा यी सबै विषयमा प्राविधिक, कानुनी र नीतिगत सिफारिस तयार गर्नेछौं । यी सिफारिसहरूलाई सरकार, मन्त्रालय र सम्बन्धित निकायमा पु¥याउने हाम्रो योजना छ ।
व्यापारको वर्तमान स्थिति र भविष्यको सम्भावना कस्तो देख्नुहुन्छ ?
अहिले व्यापार केही सुस्त छ, तर ठूला पूर्वाधार परियोजना, हाइड्रोपावर र सडक विस्तारका कामसँगै फेरि अवसर बढ्नेछ । हामी पुराना उपकरणलाई मर्मत वा सट्टापट्टा गरेर दक्षतापूर्वक प्रयोग गर्ने र नयाँ उपकरणमा लगानी बढाउने सुझाव दिइरहेका छौं ।
अन्त्यमा, भेलामा सहभागी व्यवसायी र सरोकारवालालाई के सन्देश दिन चाहनुहुन्छ?
यो भेला हाम्रो साझा मञ्च हो । यहाँको निर्णयले हाम्रो व्यवसायको भविष्य निर्धारण गर्नेछ । सबैलाई सक्रिय सहभागिताको आग्रह गर्दछु । एकजुट भएर हामी समस्यालाई अवसरमा रूपान्तरण गर्न सक्छौं । पोखरामा भेटौं, सफलतासहित फर्कौं ।
Comments are closed.