झापा । पूर्वीनाका काँकडभिट्टाबाट कोदोको आयात अघिल्लो वर्षका तुलनामा वृद्धि भएको छ । प्लान्ट क्वारेन्टिन कार्यालय काँकडभिट्टाका सूचना अधिकारी चन्द्रकिशोर ठाकुरले २०८० र ८१ मा रु ८५ करोड ४२ लाख ५६ हजार मूल्य बराबरको १७ हजार ७९७ मेट्रिक टन कोदो भारतबाट आयात भएको जानकारी दिए ।
उनका अनुसार आव २०७९–८० मा रु ५१ करोड ३१ लाख २० हजार मूल्य बराबरको १६ हजार ३५ मेट्रिक टन कोदो भारतबाट आयात भएको थियो । नेपालमा कोदो बाली उत्पादन घट्दै जाँदा भारतलगायत तेस्रो देशबाट कोदोको आयात बढेको सूचना अधिकारी ठाकुरले बताएका छन् ।
पूर्वी पहाडी जिल्लामा यथेष्ट उत्पादन हुने फर्सी विक्री नहुँदा किसान गाईभैँसीलाई खोले पकाएर खुवाउँछन् । तर त्यही फर्सी बजारमा भने भारतबाट ठूलो मात्रामा आयात हुने गरेको छ । उनले सोही अवधिमा फर्सी मात्र रु २१ करोड १४ लाख ८० हजारको १० हजार ५७४ मेट्रिक टन आयात भएको जानकारी दिए ।
उनका अनुसार गत एक वर्षमा रु १ अर्ब २ करोड २२ लाख ६० हजार मूल्य बराबरको ५१ हजार ११३ मेट्रिक टन गोलभेँडा, रु २९ करोड ५७ लाख ४० हजार मूल्य बराबरको १४ हजार ७८७ मेट्रिक टन हरियो खुर्सानी पूर्वीनाका हुँदै भारतबाट भित्रिएको छ । सोही अवधिमा रु ५७ करोड ७३ लाख ८० हजार मूल्य बराबरको २८ हजार ८६९ मेट्रिक टन करेला, रु ३० करोड ७ लाख ८० हजार मूल्य बराबरको १५ हजार २९ मेट्रिक टन भिन्डी र रु १५ करोड ६७ लाख २० हजार मूल्य बराबरको ७ हजार ८३६ मेट्रिक टन सिमी आयात भएको सूचना अधिकारी ठाकुरले जानकारी दिएका छन् ।
पूर्वीनाकाबाट सोही अवधिमा रु १३ करोड ८ लाख ४० हजार मूल्य बराबरको ६९२ मेट्रिक टन प्याज, रु २५ करोड ६५ लाख ६० हजार बराबरको १२ हजार ८२८ मेट्रिक टन परवल, रु ६७ करोड ७० लाख मूल्य बराबरको ३ हजार ८३५ मेट्रिक टन घिरौला, रु ११ करोड १७ लाख मूल्य बराबरको ५ हजार ५८५ मेट्रिक टन गाजर, रु ३१ करोड ५० लाख मूल्य बराबरको १ हजार ५७५ मेट्रिक टन स्कुस र रु ३ करोड ८० लाख ४० हजार बराबरको १ हजार ९०२ मेट्रिक टन तरुल भारतबाट आयात भएको तथ्याङ्कले देखाउँछ ।
मधेसबाट हिमाली जिल्लासम्म उत्पादन हुने फापरसमेत भारतबाट ठूलो मात्रामा आयात हुने गरेको छ । सूचना अधिकारी ठाकुरका अनुसार एक वर्षमा रु १ करोड ३५ लाख ८५ हजार मूल्य बराबरको २०९ मेट्रिक टन फापर, रु ४ करोड ६१ लाख ७६ हजार मूल्य बराबरको १ हजार ४४३ मेट्रिक टन मकै (पशु दाना) आयात भएको छ ।
कार्यालयका अनुसार सोही अवधिमा रु ४ अर्ब ८७ करोड ६५ लाख १८ हजार बराबरको ९८ हजार ३९४ मेट्रिक टन फलफूल तथा चामल, रु १७ करोड २८ लाख २४ हजार बराबरको ७ हजार २०१ मेट्रिक टन र दलहन (गेडागुडी) रु २ करोड ४० लाख ९६ हजार मूल्यको आयात भएको कार्यालयको तथ्याङ्कले देखाएको छ । भारतबाट आयातित तरकारीका कारण स्वदेशमा किसानले उत्पादन गर्दै आएको तरकारी बाली बजारमा बिक्री नभएको किसानको गुनासो छ ।
Comments are closed.