पोखरा । पोखराको पालिखेचोकस्थित प्रतिभा माविमा आइतबार विज्ञान प्रदर्शनी आयोजना गरिएको छ । विद्यार्थीमा नयाँ ज्ञान र खोज सहितको प्रतिभा बाहिर ल्याउनका लागि विज्ञान प्रदर्शनी आयोजना गरिएको विद्यालयले जनाएको छ ।
विद्यालय सञ्चालक समितिका अध्यक्ष नारायण पौडेल र राष्ट्रिय परीक्षा बोर्डका गण्डकी प्रमुख गोबिन्दराज पोखरेलले प्रदर्शनीको उद्घाटन गरेका हुन् । विद्यालयका प्राचार्य किरण सापकोटाले विद्यार्थीमा लुकेको प्रतिभा प्रस्फुटन गराउने उद्देश्यले एकदिने प्रदर्शनी आयोजना गरिएको बताए ।
सापकोटाका अनुसार कक्षा ४ देखि १२ सम्मका विद्यार्थी प्रदर्शनीमा सहभागि थिए । दसैं–तिहारको विदा रचनात्मक र सिर्जनशील बनाउनका लागि र नयाँ कुरा सिक्ने अवसर दिलाउनका लागि विद्यालयले विद्यार्थीलाई विज्ञानसँग सम्बन्धित रहेर विभिन्न प्रोजेक्ट तयार पार्न लगाएको थियो । विदाको सदूपयोग गर्दै तयार पारिएका तिनै प्रोजेक्ट विद्यार्थीले प्रदर्शनमा राखेका थिए ।
‘परम्परागत रुपमा दिइने गृहकार्य भन्दा पनि माथि उठेर विद्यार्थीलाई वैज्ञानिक ढंगले नयाँनयाँ प्रोजेक्ट तयार गर्न लगाएका थियौ । विद्यार्थीले मेहनतका साथ प्रविधिमा आधारित रहेर विभिन्न सामाग्री तयार पारेका थिए,’ उनले भने, ‘विद्यार्थीका ती सामाग्री अरुलाई देखाउनका लागि पनि प्रदर्शन आवश्यक हो । माथिल्लो कक्षाका विद्यार्थीले तयार पारेका सामाग्री तल्लो तहका विद्यार्थीका लागि पनि उपयोगि र सिकाई हुन्छन् ।’
विद्यालयको छनोटको आधारमा ११ र १२ कक्षाका १५५ र कक्षा ४ देखि १० सम्मका ७८ गरि २३३ सामाग्री विद्यार्थीले प्रदर्शनमा राखेका थिए । ‘विद्यार्थीको मौलिकता यो प्रदर्शनीमा देख्न पाइन्छ । विद्यार्थीको मेहनत पनि यसमा परेको छ,’ उनले भने, ‘विद्यार्थीको सिकाईले सबैलाई हौसला दिलाएको छ । विद्यार्थीको यही सिकाईलाई कुनैदिन उपयोग गर्न पनि सकिन्छ ।’
सापकोटाका अनुसार कक्षा ४ देखि ७ सम्मको प्रतिश्पर्धामा प्रथम, द्वितीय र तृतीय हुनेलाई क्रमशः ५, ३ र २ हजार रुपैयाँका दरले पुरस्कृत गरिनेछ । त्यस्तै ८ देखि १० कक्षासम्मको प्रतिश्पर्धामा प्रथम, द्वितीय र तृतीय हुनेलाई क्रमशः ७, ५ र ३ हजार रुपैयाँका दरले पुरस्कार पाउनेछन् । ११ र १२ कक्षामा प्रथम, द्वितीय र तृतीय हुनेलाई क्रमशः २०, १५ र ७ हजार ५ सय रुपैयाँका दरले पुरस्कृत गरिने बताइएको छ । सबै विधामा तेश्रो हुने दुई समूहलाई पुरस्कृत गरिनेछ ।
त्रिभुवन र पोखरा विश्वविद्यालयका प्राध्यापकहरु सहभागि टिमले उत्कृष्ट प्रोजेक्टको मुल्याङ्कन गरेका हुन् । निर्णायक समितिका संयोजक त्रिविका प्राध्यापक डा. शोभाकान्त लामिछानेले यस्ता कार्यक्रमले विद्यार्थीको क्षमता बाहिर ल्याउन सहज हुने बताए । विभिन्न ६ वटा आधारमा विद्यार्थीले गरेको कामको मुल्याङ्कन गर्ने पनि उनले बताए ।
कार्यक्रमका प्रमुख अतिथि राष्ट्रिय परीक्षा बोर्डका गण्डकी प्रमुख गोबिन्दराज पोखरेलले विद्यालय शिक्षा सैद्धान्तिक मात्र नभई प्रयोगात्मक पनि हुनुपर्ने बताए । ‘हामीले धेरैजसो अवस्थामा सैद्धान्तिक ज्ञान मात्र दिन्छौ । तर, प्रतिभाले प्रयोगात्मक ज्ञान पनि दिने गरेको विद्यार्थीको यो मेहनतले पुष्टि गर्छ,’ उनले भने, ‘हामी अहिलेका यिनै विद्यार्थी भविश्यका जनशक्ति हुुन । त्यही अनुसार हामीले तयारी गर्नुपर्छ ।’
विद्यालय सञ्चालक समितिका अध्यक्ष नारायण पौडेलले विज्ञान प्रदर्शनी परम्पराका रुपमा मात्र नभई नयाँ ज्ञान र सीप देखाउनका लागि उपयोगी हुने बताए । ‘नयाँ खोज र पहिचानले विद्यार्थीको क्षमता प्रस्ट पार्छ,’ उनले भने, ‘विद्यार्थीले अहिले तयार पारेका यी सामाग्रीले भविश्यमा पनि नयाँ पहिचान दिन सक्नुपर्छ ।’ विद्यार्थीले नयाँ सोँच र प्रतिभालाई बाहिर देखाउनुपर्ने र यस्ता कार्यक्रम गतिला अवसर बन्ने उनले बताए । ‘यस्तै कार्यक्रममार्फत नयाँ र क्षमतावान बैज्ञानिक तयार हुनसक्छन,’ उनले भने ।
प्रदर्शनीमा अरु विद्यालयबाट विद्यार्थीलाई प्रदर्शनी अवलोकनका लागि ल्याइएको थियो । विज्ञान विषयका विद्यार्थीको यो प्रदर्शनीपछि व्यवस्थापन र होटल व्यवस्थापन विषयका विद्यार्थीका लागि पनि कार्यक्रम हुनेछन् । व्यवस्थापन र होटल व्यवस्थापन विषयका विद्यार्थीका लागि बिजनेस प्लान गर्ने सम्बन्धि प्रतिस्पर्धा सञ्चालन गरिनेछ । त्यसबाहेक होटल व्यवस्थापन विषयका विद्यार्थीका लागि फूड फेस्टिबल पनि सञ्चालन गरिने विद्यालयले जनाएको छ ।
Comments are closed.