सुशीला रेग्मी
रामपुर (पाल्पा) । पाल्पामा बसोबास गर्ने इस्लाम धर्मावलम्बीहरुले सोमवार हर्षोल्लासका साथ ईद–उल–फित्र (ईद) मनाइएका छन् । यहाँका मुस्लिम समुदायहरु विहान मस्जिदमा सामुहिक नमाज पढेर एकापसमा शुभकामना आदानप्रदान गर्दै हर्षोल्लासका साथ ईद पर्व मनाएका हुन् ।
रामपुर नगरपालिका–४ स्थित ईस्लामपुर क्षेत्रमा रहेका मस्जिदमा रामपुर र स्याङ्जाको चापाकोट नगरपालिकामा बसोबास गर्ने इस्लाम धर्मावलम्बीहरुले विहान ८ वजे सामुहिक नमाज पढेर ईद पर्व मनाइएको नेपाल मुस्लिम संघ पाल्पाका उपाध्यक्ष तथा रामपुर–४ का वडा सदस्य मोहम्मद ताजिम शेखले बताए ।
“नमाज पढ्नुभन्दा अघि मुस्लिम समुदायका प्रत्येक व्यक्तिबाट अनिवार्य रुपमा प्रतिव्यक्ति रु १५० दान सङ्कलन गरिएको छ, सो दान रकम समुदायका आर्थिक अवस्था कमजोर भएका परिवारलाई वितरण गरिनेछ” उनले भने,–“कमाई हुनेले आफ्नो आम्दानीको आधारमा साढे दुई प्रतिशत रकम गरिव, दुःखी परिवारलाई वितरण गरिनेछ” ।
रामपुर नगरपालिकाभित्र करिव २५० घरपरिवार मुस्लिम समुदायको बसोबास छ । यहाँको वडा नं ४ ईस्लामपुर क्षेत्रमा भने मुस्लिम समुदायको बाक्लो वस्ती रहेको छ । यहाँ रहेका दुईवटा मन्दिरमा विहान नमाज पढ्नेको उल्लास थियो । मुस्लिम समुदायका बर्तालु ईदका दिन बिहानै मस्जिद तथा ईदगाहमा पुगेर सामूहिक नमाज पढ्ने, अल्लाह (भगवान) सँग आफू तथा आफ्नो परिवारकोबाट भएको गल्तीको क्षमायाचना गर्दै आशीर्वाद लिने गर्दछन् । यसो गरेमा मोक्ष प्राप्ती हुने विश्वास लिइन्छ ।
अहिले यहाँका समुदाय एकापसमा शुभकामना आदानप्रदान गर्दै खुशी साटासाट गरिरहेका छन् । इस्लाम धर्मावलम्बीहरुको पर्व ईदको अवसरमा यहाँका हिन्दु समुदायले पनि सामाजिक सद्भाव कायम राख्दै शुभकामना व्यक्ति गरेका छन् । यो चाड इस्लामिक पात्रोअनुसार नवौँ महिना रमजानभर गरिएको उपवास (रोजा) को समापनमा मनाइन्छ ।
रामपुरमा रमजानको अवसरमा आयोजित शुभकामना आदानप्रदान तथा बृहत् ईफ्तार कार्यक्रममा सहभागीले समुदायमा फरक धर्मावलम्बी, जातजातीको बसोबास रहेपनि सामाजिक सद्भाव र एकता कायम गर्दै भाइचाराको सम्बन्ध स्थापित गर्नुपर्ने बताएका छन् । यहाँको ४ नम्वर वडा कार्यालयले ईस्लाम धर्मावलम्बीहरुको पवित्र महिना रमजानको अवसर पारेर आयोजना गरेको यस कार्यक्रम स्थानीय तहमा नयाँ कार्यको सुरुवात पनि हो ।
वडामा बसोबास गर्ने सबै जातजाती, समुदायको सम्बन्ध एकापसमा सहिष्णुता कायम राख्न पालिकास्तरमा पहिलो पटक वडा कार्यालयले नयाँ कार्यक्रमको सुरुवात गरेको वडाध्यक्ष रामबहादुर रानाले जानकारी दिए । यहाँ बसोबास गर्ने एक समुदायले अर्को समुदायको दुःख सुखमा सहयोग, साथ दिदै आएको र विभिन्न समुदाय, जातजाति, भाषाभाषी, संस्कृति, रितिरिवाजले रामपुरको वडा नं ४ भरिपूर्ण रहेको वडाध्यक्ष राना बताउँछन् ।
कार्यवाहक नगर प्रमुख दोवराज तिवारीले सबै नेपालीमा एकापसमा सद्भाव तथा भाइचाराको सम्बन्ध कायम राख्नुपर्ने बताए । रामपुरमा पनि फरक–फरक समुदाय, जातजाती भएपनि एकापसमा सहकार्य र समन्वय गर्दै धार्मिक, सामाजिक लगायत विभिन्न कार्यमा सक्रिय भएर अगाडी बढेको कार्यवाहक नगर प्रमुख तिवारीको भनाइ छ ।
मुस्लिम धर्मावलम्बीहरुले रमजानको बेला आफूसंग भएका गरगहना, धन, अन्नपातबाट आफूभन्दा कमजोर परिवारलाई सहयोग गर्दै आइरहेको र जकात (दान अर्थात् सहयोग) मुस्लिमलाई नै मात्र दिनुपर्छ भन्ने छैन, अन्य समुदायका आर्थिक अवस्था कमजोर भएका नागरिकलाई पनि दिन सकिने नेपाल मुस्लिम संघका केन्द्रीय उपाध्यक्ष हाजि हजिलदिन मियाँ बताउँछन् । यहाँ बसोबास गर्ने मुस्लिम धर्मावलम्बीहरु अन्य समुदायसंग मिलेर सामाजिक कार्यमा सक्रिय सहभागीता जनाउँदै आएका छन् ।
Comments are closed.