रामपुर (पाल्पा) । दुवै मिर्गौलाले काम गर्न छाडेपछि यामबहादुर रानालाई उपचारमा समस्या परेको छ । पाल्पाको निस्दी गाउँपालिका–२ भाङबारीका ३३ वर्षीय राना वैदेशिक रोजगारको क्रममा युएईमा कार्यरत थिए ।
स्वास्थ्यमा समस्या देखिएपछि वैदेशिक रोजगारबाट आफ्नो काम बीचमै छाडेर स्वदेश फर्कन बाध्य भए । म्यानपावरबाट आफूलाई भनेजस्तो काम र तलब नपाए पनि परिवार धान्न मजदुरी गरिरहनुभएको थियो । एक्कासी दुवै मिर्गौलाले काम गर्न छाडेपछि पीडा बोकेर उनी स्वदेश फर्के ।
पाल्पा सामुदायिक डायलाइसिस सेन्टर तानसेन–५ बन्दीपोखराबाट रानाले नियमित डाइलायसिस गरिरहेका छन् । विदेश जादा लिएको ऋण पनि पूरा गर्न नपाउँदै बिरामी भएर फर्कनुपर्दा परिवार विचल्लीमा परेको छ । आफू कार्यरत कम्पनीले जहाजको टिकट मात्र उपलब्ध गराएको रानाले जानकारी दिए ।
“एक्कासी दिसा र पिसावमा समस्या देखिएपछि अस्पताल भर्ना भए, दुई हप्ता अस्पताल बसेपछि कम्पनीलाई अनुरोध गरेर नेपाल फर्किएको हुँ, विदेश गएको १८ महिनामै बिरामी भएर स्वदेश फर्कनु परेको छ, आफू नै बिरामी परेपछि परिवारमा पीडा थपिएको छ, उपचार गराउन समस्या भइरहेको छ” उनले भने ।
राना गएको माघ अन्तिम हप्ता घर आइपुगेका हुन् । दाजुभाई र आफन्तको सहयोगमा उपचार गर्दै आइरहेको उनका दाजु दिलबहादुर राना बताउँछन् । डायलाइसिस निःशुल्क भएपनि औषधी र यातायात खर्च धान्न समस्या भएको हुँदा भाईको उपचारमा आर्थिक सहयोग गर्न सबैसंग उनले अनुरोध गरेका छन् ।
परिवारको अभिभावक नै बिरामी परेपछि दैनिक गुजारा चलाउन, बिरामीको औषधोपचार गर्न समस्या भएको उनकी श्रीमती सुकमाया राना बताउँछिन् । “परिवारमा कमाउने व्यक्ति कोही छैनन्, हप्तामा दुई पटक डायलाइसिसका लागि अन्यत्र अस्पताल लैजानुपर्दछ, आयस्रोत केही नहुँदा बिरामीको उपचार र परिवार कसरी चलाउने भन्ने चिन्ताले सताएको छ” उनले गुनासो पोखिन् ।
Comments are closed.