सुशीला रेग्मी
रामपुर (पाल्पा) । पाल्पाको रामपुरमा सञ्चालन भएको चौथो रामपुर महोत्सव तथा व्यापार मेलाको आम्दानी खर्च सार्वजनिक गरिएको छ । रामपुर उद्योग वाणिज्य संघको आयोजनामा गत माघ १५ देखि २७ गतेसम्म सञ्चालन भएको मेलाको बुधबार पत्रकार सम्मेलन गरी संघका अध्यक्ष भोजेन्द्रप्रकाश ढकालको अध्यक्षतामा आम्दानी खर्च सार्वजनिक गरिएको हो ।
अध्यक्ष ढकालले मेलामा १ करोड १ लाख २४ हजार ८ सय १७ कुल खर्च, २८ लाख ८५ हजार २ सय ६८ वचत र १ करोड ३० लाख १० हजार ८५ रुपैयाँ कुल आम्दानी भएको जानकारी दिए । वचत भएको रकमले संघको भवन निर्माणलाई पूर्णता दिने उनले बताए । खर्च भएका रकमको विल भुक्तानीमा ढिला भएकाले समयमै खर्च सार्वजनिक गर्न नसकिएको अध्यक्ष ढकालले बताए । मेला अवधिभर ८ करोड बढीको कारोबार भएको थियो ।
प्रवेश टिकट बिक्रिबाट ६९ लाख ८१ हजार १ सय विशेष टिकट बिक्रिबाट ६८ हजार ७ सय ५०, स्टल तथा होटलबाट ५१ लाख ३४ हजार ५ सय, प्रायोजक तथा सहप्रयोजकबाट ५ लाख ४६ हजार, घरेलु तथा साना उद्योग कार्यालयबाट ७३ हजार ८७५, पशुपंक्षि तथा मत्स्य विकास निर्देशनालयबाट ३० हजार, विद्युत महशुल भुक्तानी फिर्ताबाट १ लाख २५ हजार, ड्रम बिक्रिबाट २२ हजार ८ सय, ट्याङ्की स्टेन विक्रीबाट २२ हजार ३ सय र प्लाई बिक्रिबाट ५ हजार ७ सय ६० आम्दानी भएको छ ।
कार्यक्रममा मेला प्रचार प्रसार समितिका संयोजक बासुदेव ढकाल, नेपाल पत्रकार महासंघ पाल्पाका उपाध्यक्ष बन्दना पोखरेल, सहसचिव दुर्गेश मल्ल, पत्रकार इमान सिं राना, शोभाकान्त पाठकले आफ्ना जिज्ञासा सहितको धारणा राखेका छन् । वाणिज्य संघको हलमा भएको कार्यक्रममा संघका वाणिज्य उपाध्यक्ष विष्णुबहादुर सारुको स्वागत र कार्यक्रम सञ्चालन महासचिव खिमबहादुर क्षेत्रीले गरेका हुन् ।
कार्यक्रमको अवसरमा महोत्सवमा सञ्चार माध्यमबाट समाचार सम्प्रेषणमा महत्वपूर्ण भूमिका खेल्ने गोरखापत्र दैनिक, रेडियो पाल्पा तथा कटुवाल खबर डटकममा आबद्ध पत्रकार इमान सिं रानालाई नगद सहित सम्मान गरिएको छ ।
Comments are closed.