बाराको अमलेखगञ्जदेखि चितवनको लोथरसम्म ६२ किलोमिटर पेट्रोलियम पाइपलाइन निर्माण सुरू

काठमाडौं । बाराको अमलेखगञ्जदेखि चितवनको लोथरसम्म ६२ किलोमिटर पेट्रोलियम पाइपलाइन निर्माण सुरू भएको छ । नेपाल आयाल निगमले चितवनको लोथरमा फिल्ड कार्यालय स्थापना गरेसँगै पेट्रोलियम पाइपलाइन बिछ्याउने काम अघि बढेको हो ।

दोस्रो चरणको पेट्रोलियम पाइपलाइन विस्तार अन्तर्गत १५ अर्ब रुपैयाँ लागतमा ६२ किलोमिटर लामो पाइपलाइन निर्माण सुरू भएको निगमले जनाएको छ । कुल लागतमध्ये १० अर्ब नेपाल आयल निगम र ५ अर्ब भारतीय आयल निगमले व्यहोर्ने गरी २०८१ असोज १७ मा सम्झौता भएको थियो ।

अमलेखगञ्ज लोथर पेट्रोलियम पाइपलाइन विस्तार परियोजना प्रमुख इन्जिनियर प्रदीपकुमार यादवका अनुसार यो आयोजना ५४ महिना भित्र सम्पन्न गरिनेछ । अम्लेखगञ्जदेखि लोथरसम्म ६२ किमी पाइपलाइन र लोथरमा भण्डार गृहसहितको ग्रीन फिल्ट टर्मिनल निर्माण गरिने उनले बताए ।

आयोजना अन्तर्गत पाइपलाइन बिछ्याउनेदेखि अत्याधुनिक डिपो निर्माणसम्मका सबै काम भारतीय पक्षले नै गर्ने परियोजना प्रमुख यादवले जानकारी दिए । लोथरमा कुल १६० वर्गमिटरको क्षेत्रफलमा पाइपलाइन स्टेशन निर्माण हुनेछ । पाइपलाइन निर्माणका लागि ४ अर्ब २८ करोड र भण्डारगृह सहितको ग्रीन फिल्ट टर्मिनलका लागि ९ अर्ब ८० करोड रुपैयाँ खर्च हुनेछ ।

यादवका अनुसार बाराको अमलेखगञ्जबाट पूर्वपश्चिम महेन्द्र राजमार्गसँगै समानान्तर हुने गरी ६२ किलोमिटर लामो १०.७५ इन्चको पाइपलाइन बिछ्याइने छ । जसबाट प्रतिघण्टा २७३ किलोलिटरको गतिमा पेट्रोलियम पद्धार्थ ढुवानी गर्न सकिनेछ । लोथरमा झण्डै ९२ हजार किलोलिटर क्षमताको आधुनिक पेट्रोलियम पद्धार्थ भण्डार गृह निर्माण गरिने छ । जसमा पेट्रोलका लागि ११ हजार किलोलिटर क्षमताका ३ वटा भर्टिकल ट्यांकी निर्माण गरिने छ ।

त्यस्तै, डिजेलका लागि १५ हजार ५०० किलोलिटर, हवाई इन्धनका लागि ३ हजार ६० किलोलिटर क्षमताका ३/३ वटा र मट्टितेलका लागि ८०० किलोलिटर क्षमताका दुई वटा भण्डारण टयांकी निर्माण गरिनेछ । नेपाल र भारत बीच २०८० जेठ १८ मा अमलेखगञ्ज लोथर पेट्रोलियम पाइप विस्तार सम्बन्धी सहमति भएको थियो । सोही अनुसार २०८१ असोज १७ गते नेपाल आयल निमग र भारतीय आयल निगमका बीचमा सम्झौता भएको थियो ।

भारतीय आयल नियमले तयार पारेको विस्तृत परियोजना प्रतिवेदन अनुसार नै अहिले निर्माण कार्य अघि बढाइएको हो । यसअघि २०७६ मा भारतको मोतिहारीदेखि बाराको खमलेखगन्जसम्मको ६९ किलोमिटर लामो अन्तरदेशीय पेट्रोलियम पाइपलाइन परियोजना निर्माण सम्पन्न गरिएको थियो ।