काठमाडौं । वन तथा वातावरण मन्त्रालयले वायु प्रदूषण नियन्त्रण गर्न थप ५ नयाँ मापदण्ड लागू गर्ने भएको छ । गत असार ९ गते सवारी साधनमा वायु प्रदूषण सम्बन्धी नयाँ मापदण्ड लागू गरेको मन्त्रालयले विभिन्न क्षेत्रमा वायु गुणास्तर सम्बन्धी एकैपटक ५ नयाँ मापदण्ड लागू गर्ने तयारी गरेको हो ।
मन्त्रालयले इँटा उद्योग, उद्योग प्रतिष्ठान, सिमेन्ट उद्योगमा नयाँ मापदण्ड लागू गर्ने तयारी गरेको हो । मन्त्रालयले ‘वायु गुणस्तर सम्बन्त्री राष्ट्रिय मापदण्ड २०८२’, ‘इँटा उद्योगको चिम्नीबाट उत्सर्जन हुने धुवाँ चिम्नीको उचाइ तथा इँटा उद्योगको संचालन सम्बन्धी मापदण्ड २०८२’, ‘उद्योग प्रतिष्ठानहरूमा जडान भएका ब्वाइलरको सञ्चालनबाट निष्काशन हुने धुवाँ तथा चिम्नीको उचाइ सम्बन्धी मापदण्ड, २०८२’ लागू गर्ने भएको हो ।
त्यस्तै, ‘औद्योगिक फर्नेसको सञ्चालन, सञ्चालनबाट निष्काशन हुने धुवाँ तथा चिम्नीको उचाइ सम्बन्धी मापदण्ड, २०८२’ र सिमेन्ट उद्योगबाट उत्सर्जन हुने धुलो, धुँवा तथा चिम्नीको उचाइ सम्बन्धी मापदण्ड, २०८२’ लागू गर्ने तयारी गरेको हो । मन्त्रालयले ५ वटै नयाँ मापदण्डको मस्यौदा बनाई सार्वजनिक समेत गरेको छ ।
साथै, सरोकारवाला ११ संस्थाहरूसँग राय सुझाव मागेको छ । मन्त्रालयले अटोमोबाइल क्षेत्रका दुई संस्था नाडा अटोमोबाइल्स एसोसिएसन अफ नेपाल (नाडा) र नेपाल अटोमोबाइल इम्पोर्टर्स एण्ड म्यानुफ्याक्चर्स एसोसिएसन (नाइमा)सँग पनि सुझाव मागेको हो ।
प्राप्त हुने सुझावलाई समेटी ५ वटै नयाँ मापदण्ड चाँडै लागू गरिने मन्त्रालयले जनाएको छ । मन्त्रालयले यसअघि दुइपाँग्रेमा युरो ५ र चारपाँग्रे सवारी साधनमा युरो ६ मापदण्ड लागू गरेको थियो ।
Comments are closed.