काठमाडौं । सरकारले थप ७ वटा यातायात कार्यालयहरूबाट इम्बोस्ड नम्बर प्लेट जडान सुरू गर्ने भएको छ । यातायात व्यवस्था विभागका अनुसार आगामी असोज १ गतेदेखि देशका थप ७ कार्यालयबाट पनि इम्बोस्ड जडान गरिने भएको हो ।
विभागका अनुसार हाल देशभरका ९ वटा कार्यालयबाट इम्बोस्ड जडान भइरहेको छ । विभागले असोज १ गतेदेखि सवारी दर्ता, नामसारी र नवीकरणमा इम्बोस्ड अनिवार्य गरेसँगै सेवा केन्द्र पनि थप्न लागेको हो ।विभागका अनुसार असोज १ गतेदेखि बागमती प्रदेशको यातायात व्यवस्था कार्यालय, चितवन, सुदूरपश्चिमको यातायात व्यवस्था कार्यालय धनगढी र कञ्चनपुरबाट इम्बोस्ड जडान सुरू गरिनेछ ।
त्यस्तै, मधेशको यातायात व्यवस्था कार्यालय लहान सिरहा र यातायात व्यवस्था कार्यालय, वीरगंज पर्सा, कोशीको यातायात व्यवस्था कार्यालय, इटहरी सुनसरी र झापाको बिर्तामोडबाट पनि जडान थालिने विभागले जनाएको छ । विभागका अनुसार हाल देशभरका ९ वटा कार्यालयबाट इम्बोस्ड जडान भइरहेको छ । जसमा बागमती प्रदेशको यातायात व्यवस्था कार्यालय एकान्तकुना ललितपुर, यातायात व्यवस्था सेवा कार्यालय हेटौंडा मकवानपुर र यातायात व्यवस्था कार्यालय गुर्जुधारा र सवारी परीक्षण कार्यालय टेकुमा इम्बोस्ड नम्बर जडान भइरहेको छ ।
त्यस्तै, गण्डकी प्रदेशमा यातायात व्यवस्था कार्यालय कास्की पोखरा, लुम्बिनीमा यातायात व्यवस्था कार्यालय रुपन्देही बुटवल, दाङ तुल्सीपुर र नेपालगञ्ज बाँके, कर्णाली प्रदेशमा यातायात व्यवस्था कार्यालय सुर्खेतबाट जडान भइरहेको छ । इम्बोस्ड नम्बर प्लेट जडान भएका सवारी साधनको विवरण डिजिटाइज गर्न विभागले देशका मुख्य १० प्रवेश बिन्दुमा आरएफआईडी गेट बनाउने भएको छ । तीमध्ये हाल काठमाडौंको नागढुंगा र नागार्जुनमा निर्माण सम्पन्न भई प्रयोगमा समेत ल्याइसकिएको विभागले जनाएको छ ।
सरकारले यातायात प्रणालीलाई आधुनिक, सुरक्षित र पारदर्शी बनाउन इम्बोस्ड नम्बर प्लेट जडान अनिवार्य गर्ने नीति लिएको छ । यसले ट्राफिक व्यवस्थापनलाई सहज बनाउने, अपराध नियन्त्रणमा सहयोग पुग्ने र डिजिटल प्रणालीमार्फत निगरानी गर्न सजिलो हुने विभागको दाबी छ ।
Comments are closed.