पाँच वर्षभित्र आर्थिक वृद्धिदर दोहोरो अंक नजिक पुर्‍याउने सरकारको लक्ष्य

काठमाडौं । पाँच वर्षभित्र आर्थिक वृद्धिदर दोहोरो अंक नजिक पुर्‍याउने सरकारले लक्ष्य लिएको छ । सरकारले आज आफ्नो नीतिगत प्राथमिकता र न्यूनतम कार्यक्रममार्फत आगामी पाँच वर्षभित्र नेपालको आर्थिक वृद्धिदर दोहोरो अङ्क नजिक पुर्‍याउने महत्वाकांक्षी योजना सार्वजनिक गरेको हो।

दीगो विकास, आन्तरिक उत्पादनमा वृद्धि, सार्वजनिक खर्च कटौती, रोजगार तथा उद्यमशीलतालगायतका विषयलाई सरकारले प्राथमिकतामा राखेको छ।

यिनै प्राथमिकतालाई प्रभावकारी रुपमा कार्यान्वयन गरेर उच्च अंकको आर्थिक वृद्धिदर हासिल गर्ने सरकारको नीतिगत प्राथमिकता र न्यूनतम कार्यक्रममा उल्लेख गरिएको छ। कृषि तथा वन, उद्योग, पर्यटन, ऊर्जा, सूचना प्रविधि र भौतिक पूर्वाधारलाई आर्थिक वृद्धिको प्रमुख संवाहकका रूपमा विकास गर्ने सरकारको योजना छ।

त्यस्तै, अनौपचारिक आर्थिक गतिविधिलाई औपचारिक क्षेत्रमा ल्याउने विषयलाई पनि सरकारले प्राथमिकतामा राखेको छ। मुलुकको आर्थिक विकासका लागि निजी क्षेत्रको सहभागितालाई पनि सरकारले आफ्नो प्रमुख एजेन्डा बनाएको छ ।