रामपुर (पाल्पा) । आज विश्वभर ‘महिलामा लगानीः सभ्य र समुन्नत समाजको थालनी’ भन्ने नाराका साथ आज ११४ औँ अन्तर्राष्ट्रिय नारी दिवस देशभर मनाइदैछ । नारी दिवसको अवसरमा विभिन्न संघ संस्था, निकायले महिलाका हकहित, सचेतनामुुलक लगायत विविध कार्यक्रम आयोजना गरिरहेका छन् ।
पाल्पाको रामपुर नगरपालिकाले खेल क्षेत्रमा हौसला बढाउँदै महिला खेलाडीलाई सम्मान कार्यक्रम गरेको छ । नगर उपप्रमुख बालकुमारी थापाको अध्यक्षतामा नगरपालिकाको सभाहलमा महिला भलिबल खेलाडीलाई सम्मान कार्यक्रम भएको छ ।
लुम्बिनी प्रदेशको महिला भलिबल टिमलाई नगदसहित नगरपालिकाले सम्मान गरेको हो । खेलाडी तथा अफिसियललाई नगद र सम्मान पत्र सहित सम्मान गरिएको नगरपालिकाले जनाएको छ । नगर प्रमुख रमणबहादुर थापाले रामपुरमा खेलका लागि विभिन्न पूर्वाधार निर्माणमा जोड दिएको बताए ।
उनले नगरभित्र दुईवटा कवर्डहल निर्माण भइरहेको र आगामी वर्ष भलिबल स्टेडियम निर्माणका लागि रु एक करोड विनियोजन गर्ने प्रतिवद्धता जनाए । क्षेत्रीयस्तरको रंगशाला निर्माणको लागि डिपीआर तयार गरिएपनि वजेट धेरै लाग्ने हुदा स्थानीय तहले मात्र सम्भव नभएको नगर प्रमुख थापाको भनाई छ ।
पछिल्लो समय खेलमा महिलाको राम्रो आकर्षण बढ्दै गएको हुदा प्रोत्साहन गर्दै यसवर्ष अन्तर्राष्ट्रिय महिला दिवसको अवसर पारेर भलिबल खेलाडीलाई सम्मान गरिएको नगर उपप्रमुख बालकुमारी थापाले बताइन् ।
निमिक्त प्रमुख प्रशासकिय अधिकृत चेमनप्रकाश पोखरेलले अन्य क्षेत्रमा सरकारले आवश्यकताको आधारमा वजेट लगानी गरेपनि खेलकुद क्षेत्रमा अधिकार र आवश्यकता दुवैलाई आधार मानेर लगानी बढाउनु आवश्यक रहेको बताए ।
कार्यक्रममा नगरपालिकाका प्रवक्ता तथा वडा नं १ का वडाध्यक्ष कपिलबहादुर खाँण, कार्यपालिका सदस्य शारदा आचार्य, नेपाल प्रेस युनियनका केन्द्रिय उपाध्यक्ष माधव अर्याल, लुम्बिनी भलिबल टिमका प्रशिक्षक अर्जुन घिमिरे, लुम्बिनी प्रदेश भलिबल टिमका टिम क्याप्टेन निशा चौधरीले खेल क्षेत्रसंग सम्बान्धित आफ्ना धारणा राखेका थिए ।
रामपुरमा हालै सम्पन्न प्रथम लुम्बिनी कप राष्ट्रिय महिला भलिबल प्रतियोगितामा तृतीय स्थान हासिल गर्न सफल टिमलाई प्रोत्साहनका लागि सम्मान गरिएको हो । रामपुरमा भएको प्रतियोगितामा पहिलो एपीएफ, दोस्रो बागमती र तेस्रो लुम्बनी भएका थिए । तेस्रोका लागि भएको खेलमा कोशी प्रदेशलाई सोझो सेटमा हराएर लुम्बनीले जित हासिल गर्न सफल भयो ।
लुम्बिनीकी मीना सुनार खेलको प्लेयर अफ द म्याच घोषित भइन् । पहिलो पटक पाल्पाको रामपुरमा भएको प्रथम लुम्बिनी कप अन्तर्गतको राष्ट्रिय महिला भलिबल प्रतियोगिता सफलतापूर्वक सम्पन्न भएको छ ।
रामपुर नगरपालिकाले अघिल्ला वर्षमा ज्येष्ठ नागरिक, श्रमिक, कृषि, उद्यमी, पशुपालन, विभिन्न पेशा, व्यावसायमा आबद्ध महिला, महिला सञ्चारकर्मी लगायतलाई सम्मान गरिसकेको छ । कार्यपालिका सदस्य दुर्गादेवी भण्डारी गौतमको स्वागतबाट सुरु भएको कार्यक्रम महिला विकास सहायक निरीक्षक पुजा परियारको सञ्चालनमा चलेको हो ।
Comments are closed.