रामपुर (पाल्पा) । रामपुर नगरपालिका वडा नं ६ स्थित प्याकलुक सोमरामा निर्माण भएको शिवालय मन्दिरको नगर प्रमुख रमणबहादुर थापाले उद्घाटन गरेका छन् ।
आज महाशिवरात्रीको अवसर पारेर यहाँ निर्माण गरिएको शिवालय मन्दिरको उद्घाटन गरिएको हो ।
नगर प्रमुख थापाले नवनिर्मित मन्दिरको उद्घाटन गर्दै मन्दिरमा गरिने पुजापाठले मात्र धर्म पुरा नहुने भन्दै अन्तर आत्मादेखि गरिएको सङ्कल्प र व्यवहारले मात्र धर्मको औचित्य पुरा हुने बताए ।
नगर प्रमुख थापाले नगरपालिकामा धार्मिक पर्यटन विकास र धार्मिक महत्व बोकेका स्थानको प्रवद्र्धनका लागि नगरपालिका प्रतिबद्ध भएर लागेको बताएका छन् ।
धार्मिक पर्यटनको रुपमा रामपुरलाई चिनाउन नगरपालिकाले पूर्वाधार निर्माणमा जोड दिएको नगर प्रमुख थापाले जानकारी दिए ।
कार्यक्रममा रामपुर नगरपालिकाका नगर सल्लाहकार देवराज ढकाल, निवर्तमान वडाध्यक्ष हुमनाथ न्यौपाने, रामप्रसाद गैरे, विष्णुमाया ढकाल लगायतले आफ्ना भनाई राखेका छन् ।
मन्दिर व्यवस्थापन समितिका अध्यक्ष खेमकर्ण भट्टराईको अध्यक्षतामा भएको मन्दिर कार्यक्रममा समाजसेवी कृष्णकुमार अर्यालले स्वागत र कार्यक्रमको सञ्चालन ओमप्रकाश बस्यालले गरेका हुन् । आज महाशिवरात्री पर्व भएकाले मन्दिरमा पूजाआजा तथा दर्शन गर्नेको चहलपहल छ ।
Comments are closed.