पोखरा । पोखराको रामबजारस्थित एसओएस हर्मन माइनर स्कुल गण्डकीबाट राष्ट्रिय सेवा दल (एनसिसी) को प्रशिक्षणमा सहभागी विद्यार्थीको अभिमुखीकरण कार्यक्रम सम्पन्न भएको छ । विद्यालयको सभाकक्षमा आयोजित एक विशेष समारोहका बीच भएको अभिमुखिकरण कार्यक्रमअन्तर्गतको प्रथम प्रवचन समारोह आयोजना गरिएको हो ।
पोखरा महानगरपालिका वडा नं. १५ का वडाध्यक्ष तोरणबहादुर बानियाँको प्रमुख आतिथ्यमा भएको कार्यक्रममा विद्यालयका सहप्रधानाध्यापक प्रभास पौडेलले प्रशिक्षण अवधिभरी विद्यार्थीहरू राष्ट्रभक्तिको भावनाले ओतप्रोत रही राष्ट्रिय सेवा दलको मर्म र भावनाअनुसार कार्य गर्न सक्षम रहने विश्वास व्यक्त गर्दै सहभागीलाई स्वागत गरेका छन् ।
कार्यक्रममा राष्ट्रिय सेवा दलको सङ्क्षिप्त ऐतिहासिक झलकमाथि प्रकाश पार्दै नेपाली सेनाका सहसेनानी उमङ्ग श्रेष्ठले यसमा सहभागी हुने विद्यार्थीले प्रशिक्षण अवधिभर गर्ने गतिविधिका बारेमा जानकारी गराएका थिए । कार्यक्रममा कृष्णदल गणका गणपति प्रमुख सेनानी अमित लामाले राष्ट्रिय सेवा दलको सि सं. ५० अन्तर्गतको प्रशिक्षणमा सहभागी एसओएस गण्डकीका सम्पूर्ण विद्यार्थीप्रति शुभकामना व्यक्त गरेका छन् । विद्यार्थीमा राष्ट्रिय भावनाको विकास गर्दै उनीहरूको समग्र व्यक्तित्व विकासमा समेत प्रशिक्षणले सकारात्मक भूमिका निर्वाह गर्ने उनको धारणा छ ।
कार्यक्रममा प्रमुख अतिथि पोखरा महानगरपालिका वडा नं. १५ का वडाध्यक्ष तोरणबहादुर बानियाँले जीवनमा सीप आर्जन गर्ने धेरै उपायहरू हुने र तीमध्ये एनसिसीमार्फत् हुने प्रशिक्षण कार्यक्रम पनि एक भएको बताउँदै राष्ट्रिय सेवा दलको जुनियर डिभिजन तालिममा सहभागी एसओएसका विद्यार्थीको प्रशिक्षणको पूर्ण सफलताको कामना गरेका छन् । कार्यक्रमका अध्यक्ष प्रधानाध्यापक चूडामणि सुवेदीले पूर्ण अनुशासनमा रही आफूमा अन्तर्निहित विभिन्न क्षमता उजागर गर्न विद्यार्थीले एनसिसीको सि सं. ५० प्रशिक्षणलाई भरपुर उपयोग गर्ने विश्वास व्यक्त गरे ।
राष्ट्रिय सेवा दलको सि सं. ५० अन्तर्गतको प्रशिक्षण कार्यक्रममा एसओएस गण्डकीका तर्फबाट छात्र र छात्रा गरी जम्मा ३६ जना विद्यार्थीको सहभागिता रहनेछ । जम्मा १०० दिनसम्म चल्ने प्रशिक्षणको पहिलो चरणका ७९ दिने कार्यक्रमहरू विद्यालयमै सम्पन्न हुनेछन् भने दोस्रो चरणको कार्यक्रममा प्रशिक्षार्थीलाई २१ दिने विशेष कोर्सका लागि नवलपरासीको हात्तीखोरस्थित राष्ट्रिय सेवा दलको शिविरमा लगिनेछ ।
विद्यार्थीको सर्वाङ्गीण पक्षको मूल्याङ्कन गरी प्रारम्भिक चरणको छनोट गरिने एनसिसीको प्रशिक्षणमा एसओएस गण्डकीका विद्यार्थीले दोस्रो पटक सहभागिता जनाएको विद्यालयका सहप्रधानाध्यापक वीरसिंह बूढाले बताए । यसपूर्व २०७८ सालमा पनि विद्यालयका विद्यार्थीले यस्तै प्रकृतिको प्रशिक्षणमा सहभागिता जनाइसकेको उनले जानकारी दिए ।
अभिमुखीकरण समारोहमा एसओएस बालग्राम गण्डकीका परियोजना निर्देशक प्रदीपभक्त आचार्य, बालग्रामका युवालय प्रमुख बाबुराम बराल, शिक्षक तथा कर्मचारी कल्याणकारी युनियन एसओएस गण्डकीका एकाइ अध्यक्ष मिलन खत्री, उपसेनानी सीमा थापा, राष्ट्रिय सेवा दलका प्रतिनिधि जमदार दीपेन्द्र तिवारी, अमलदार रामचन्द्र बस्नेत, सिपाही सुमीक्षा राई, राष्ट्रिय सेवा दल एसओएस गण्डकीका शिक्षक समन्वयकर्ता दीपकबाबु नेपाली, बालग्रामका आमा प्रतिनिधि, राष्ट्रिय सेवा दलको प्रशिक्षणमा सहभागी विद्यार्थी तथा उनीहरूका अभिभावक समेत सहभागी थिए ।
Comments are closed.