पोखरा । पर्यटकीय नगरी पोखरामा बुधबारदेखि सुरु भएको २४ औं पोखरा सडक महोत्सवमा दर्शकहरुको उल्लेखनिय सहभागिता रहेको छ ।
‘सडकमै खाऔं, सडकै नाँचौ, सडकमै रमाऔं’ भन्ने मूल नाराका साथ लेकसाइडको ३ किमी क्षेत्रफल (फिस्टेल गेटदेखि जरेबर) मा सडक महोत्सव जारी छ । अंग्रेजी नयाँ वर्ष-२०२३ को अवसरमा आयोजना गरिएको महोत्सव १७ गतेसम्म संचालन हुनेछ ।
यतिबेला लेकसाइडमा सवारीसाधन आवागमन बन्द गरेर पाँचदिनसम्म सडक महोत्सव गरिन्छ । महोत्सवमा सांस्कृतिक कार्यक्रम, रात्रिकालीन कन्सर्ट, मौलिक भेषभूषा प्रदर्शन, खानाका परिकार, दोहोरी गीत प्रतियोगिता, झाँकी प्रदर्शनका साथै डुंगा दौड, भेट्रान टेनिस प्रतियोगिता, वेटर रेस, टग अफ वार, पर्यटकीय गन्तव्यको डकुमेन्ट्री प्रदर्शनीलगायत मेलाका मुख्य आकर्षणका रुपमा रहेको प्रथम उपाध्यक्ष एवं प्रचारप्रसार संयोजक विश्वराज पौडेलले बताए ।
टुबोर्ग बियर र नुड सुपेरियर भोड्का मुख्य प्रायोजक रहेको महोत्सवलाई नेपाल पर्यटन बोर्ड र गण्डकी प्रदेश सरकारले प्रवद्र्धन गरेको छ । महोत्सव अवधिभर पश्चिमाञ्चल होटल संघले कोठाभाडा लगायतमा २० प्रतिशत छुट दिएको छ । ५ दिनसम्म चल्ने महोत्सवमा ४ देखि ५ लाख दर्शकले अवलोकन गर्ने आयोजकको अनुमान छ ।
हिजो पहिलो दिन विभिन्न झाँकी र्यालीसहित सुरु भएको महोत्सव पूर्व हल्लनचोकदेखि लेकसाइडका विभिन्न भाग परिक्रमा गर्दै कोमागाने पार्क पुगेको थियो । महोत्सवको पोखरा महानगरपालिकाका प्रमुख धनराज आचार्यले उद्घाटन गरेका थिए । आजभन्दा साढे २ दशकअघि रेवान पोखराले अफसिजनको मौसममा पनि पर्यटन प्रवर्द्धन गर्ने उद्देश्यका साथ सडक महोत्सवको अवधारणा ल्याएको थियो ।
त्यसैको निरन्तरता स्वरुप हरेक वर्ष यसै समयमा पोखरा सडक महोत्सव हुँदै आएको संयोजक पौडेलले बताए । पोखरा सडक महोत्सव नेपालमै सबैभन्दा ठूलो क्षेत्रफलमा हुने महोत्सव हो । कोभिड–१९ संक्रमणलगायतका कारण २ वर्ष प्रभावित बनेको पर्यटन क्षेत्र महोत्सव सुरु भएसँगै यहाँका पर्यटन व्यवसायी उत्साहित छन् ।
Comments are closed.