काठमाडौं । पहिलो पटक शुक्रबार खुलेको सेयर बजारमा उत्साह छाउन सकेन । यस अघि साताको आइतबारदेखि बिहीबारसम्म पाँच दिन खुल्ने सेयर बजार जेठदेखि भने साताको दुई दिन शनिबार र आइतबार सार्वजनिक बिदा दिने भएपछि सेयर बजार शुक्रबार पनि खोल्ने निर्णय गरिएको हो । तर, सुरुवाती दिनमै नेप्से दोहोरो अंकले घटेको छ ।
आज सेयर बजार परिसूचक नेप्से १५ दशमलव ८२ अंकले घटेर दुई हजार दुई सय ३५ दशमलव ९ विन्दुमा झरेको छ । आज म्युचल फन्डबाहेक सबै समूहको सेयर घटेकोमा बीमा, व्यापार, अन्य, विकास बैंक, उत्पादन समूहको सेयर धेरै अंकले ओरोलो लागेको छ । दुई सय २३ कम्पनीका २५ लाख २४ हजार कित्ता सेयर ९३ करोड रुपैयाँमा कारोबार भएको छ।
बिहीबार पनि बजार २३ दशमलव ५१ अंकले घटेर २२५० दशमलव ९१ विन्दुमा झरेको थियो। सो दिन २१९ धितोपत्र तथा ऋणपत्रको भने १ अर्ब ३० करोड रूपैयाँको कारोबार भएको थियो। आज सबैभन्दा धेरै अरुण काबेली पावर लिमिटेडको तीन करोड रुपैयाँ बराबरको सेयर किनबेच भएको छ भने, तेह्रथुम पावर कम्पनीको सेयर सबैभन्दा धेरै पाँच प्रतिशतले घटेको छ । समग्र बजार घटे पनि समुदायिक लघुवित्त, श्री इन्भेस्टमेन्ट फाइनान्स र लक्ष्मी लघुवित्तको सेयर दुई प्रतिशतभन्दा धेरैले घटेको छ ।
कारोबारमा आएका १३ वटा उपसमूहहरूमध्ये म्युचल फन्डको बाहेक सबैको नकारात्मक देखिएको छ। म्युचल फन्डको पनि जम्मा ० दशमलव ४६ प्रतिशतले बढेको हो। त्यस्तै सबैभन्दा धेरैले ट्रेडिङको २ दशमलव ३८ प्रतिशत र अन्यको २ दशमलव ०६ प्रतिशतले सेयर मूल्य घटेको छ।
Comments are closed.