पोखरा। शिक्षा, स्वास्थ्य, खेलकुद र पर्यटन प्रवर्द्धनका लागि खुल्ला चिडियाखाना निर्माणमा पहलकदमीसंगै सेती नदी संरक्षणमा काम गर्दै आइरहेको युनाईटेड क्लवले एघारौं पोखरा महोत्सवबाट सेती नदी एक पर्यटकीय गन्तब्य निर्माणमा पहलकदमी थाल्ने भएको छ।
महोत्सवकै आयोजना गरी प्रति टिकटबाट एक रुपैयाँ छुट्याउदै आएको युनाईटेड क्लवले अगामी पुस २७ देखि माघ ९ गतेसम्म पोखराको अमरसिंह चौरमा आयोजना गर्ने एघारौं पोखरा महोत्सवबाट बचत भएको रकम मध्ये केही रकम सेती नदी एक पर्यटकीय गन्तव्य निर्माणका लागि छुट्ट्याइने भएको हो।
बिहीबार सम्पन्न एघारौं पोखरा महोत्सवको सल्लाहकार तथा महोत्सव उपसमिति संयोजकहरुको बैठकले एघारौं पोखरा महोत्सवबाट सेती नदी एक पर्यटकीय गन्तब्य निर्माणका लागि युनाईटेड क्लवले पहलकदमी थाल्ने निर्णय गरेको हो। स्थापना कालदेखि नै पोखरामा खुल्ला चिडियाखाना निर्माणमा पहलकदमी थाल्दै आएको क्लवले दशौ पोखरा महोत्सवसम्म आइपुग्दा ५८ लाख ८५ हजार २ सय तीस रुपैयाँ हस्तान्तरण गरिसकेको र चिडियाखाना निर्माणको सम्पूर्ण जिम्मेवारी गण्डकी प्रदेश सरकारलाई हस्तान्तरण गरिसकेको छ।
हाल आएर चिडियाखाना राष्ट्रिय गौरवको योजना अन्तर्गत रही यसको निर्माणको जिम्मा गण्डकी प्रदेश सरकार मातहतमा रही जिल्ला डिभिजन वन कार्यालय कास्कीले लिइसकेकाले क्लवले चिडियाखाना निर्माण पहलकदमीको एजेण्डालाई आगामी दिनमा सेती नदी एक पर्यटकीय गन्तब्य निर्माणमा पहलकदमी थाल्न लागेको क्लवका अध्यक्ष राजु श्रेष्ठले जानकारी दिए ।
त्यसैगरी क्लवले एघारौ पोखरा महोत्सवबाट क्लवको जग्गा भएको स्थान पोखरा महानगरपालिका वडा नम्बर २६ अर्चलेमा रहेको जग्गामा भौतिक निर्माणका लागि समेत रकम छुट्याइने अध्यक्ष श्रेष्ठले बताए । यसबहेक क्लबले गर्दै आइरहेको सामाजिक क्षेत्रका कामहरु शिक्षा, स्वास्थ्य, खेलकुदमा समेत रकम छुट्याइ काम गरिने भएको छ ।
एघारौ पोखरा महोत्सवमा ४० देखि ५० वटा स्टल निःशुल्क रुपमा प्रदान गरिने भएको छ। जुन गैह्रनाफामुलक संस्थाहरु, पर्यटन सम्बन्धी स्टल, होम स्टेको प्रचार प्रसारका स्टल, सचेतनामुलक स्टलहरु निःशुल्क उपलब्ध गराइने प्रचार प्रसार संयोजक दिनेश सुनारले जानकारी दिए। महोत्सवमा २ सय ५८ स्टल रहने छन् ।
त्यसैगरी महोत्सवमा साधारणका लागि ८० रुपैया र विद्यार्थीका लागि ६० रुपैया टिकट दर कायम गर्ने निर्णयसंगै जेष्ठ नागरिक, एकल महिला, अपांग, सुरक्षाकर्मी, पत्रकार र विदेशी पर्यटकलाई निःशुल्क प्रवेशको व्यवस्था मिलाइएको समेत प्रचार प्रसार संयोजक सुनारले जानकारी दिए ।
महोत्सवमा ख्याति प्राप्त लोकदोहोरी गायक गायिकासंगै ख्याति प्राप्त ब्याण्डहरु, नेपाली संसकृति झल्कने झांकी तथा नृत्यहरुको समेत प्रस्तुती रहने छन्।
क्लवका वरिष्ठ उपाध्यक्ष लोकबहादुर थापाले स्वागत मन्तब्य राखेको कार्यक्रममा क्लवका संस्थापक अध्यक्ष हिमालय बख्रेल, निवर्तमान अध्यक्ष लालकाजी गुरुङ, पूर्व अध्यक्ष सुकबहादुर गुरुङ, सल्लाहकारहरु तीर्थलाल श्रेष्ठ, भरत केसी, तेजबहादुर गुरुङ, मेजर हितमान गुरुङ, दीपक थापा, लिलाधर अधिकारी, रमेशबहादुर काकी, पवित्रादेवी गुरुङ, महोत्सव हस्तकला उपसमिति संयोजक सविता श्रेष्ठ रञ्जितलगायतले महोत्सवलाई भब्यरुपमा सम्पन्न गर्न सबैले आ-आफ्नो ठाउबाट लाग्नुपर्ने बताए।
Comments are closed.