पोखरा । १८ औं संस्करणको लेखनाथ महोत्सव पोखरामा यतिबेला जारी छ । यही पुस ७ गतेदेखि सुरु भएको महोत्सवमा दर्शकको उपस्थिति उल्लेखनिय रहेको छ ।
प्रत्येक वर्ष फरक-फरक स्वाद दिँदै आएको लेखनाथ महोत्सवले यसपटक पनि दर्शकका लागि केही फरक स्वाद दिएको छ, जसका कारण दर्शको महोत्सवप्रतिको आकर्षण बढ्दो छ । महोत्सवको छैटौँ दिनसम्म आइपुग्दा कुल ४ करोड ९० लाखको कारोबार भइसकेको प्रचारप्रसार संयोजक राजेन्द्र ओझाले जानकारी दिएका छन् ।
महोत्सव आगामी १८ गतेसम्म संचालन हुनेछ । महोत्सवको पहिलो दिन ८० लाखको कारोबार भएको थियो भने दोस्रो दिन ४० लाख, तेस्रो दिन १ करोड, चौथो दिन पुस १० गते १ करोड २० लाख, ११ गते ७० लाख र १२ गते ८० लाख गरी कुल ४ करोड ९० लाखको कारोबार भएको हो ।
त्यस्तै, महोत्सवको पहिलो दिन कुल ३० हजार दर्शकले अवलोकन गर्दा ८० लाखको कारोबार भएको थियो भने दोस्रो दिन पुस ८ गते १० हजार, पुस ९ गते २५ हजार, १० गते ३० हजार, ११ गते १५ हजार, १५ हजारले गरी कुल १ लाख १० हजार दर्शकले अवलोकन गरीसकेकाे प्रचारप्रसार संयोजक ओझाले जानकारी दिएका छन् ।
महोत्सव अवधिमा दुई दिन सार्वजनिक बिदा परेको थियो । जसले गर्दा दर्शकहरुको उत्साहजनक सहभागिता रहेको थियो । महोत्सवमा मनोरञ्जनका लागि प्रत्येक दिन रत्यौली कार्यक्रमदेखि लिएर विद्यालय स्तरीय कार्यक्रम, लोकदोहोरी कार्यक्रम, भजन कृतन, लाइभ कन्सर्ट, विभिन्न जातजाति, भाषाभाषीका कार्यक्रमहरु भइरहेका छन् ।
आज भएको लोकदोहोरी कार्यक्रममा गायकहरु राजु परियार, अम्मर धिताल, माधव चापागाईं गायिकाहरु कला लम्साल, सरस्वती लामिछाने, कमला सुनारको प्रस्तुति रहेको थियो भने हाँस्यव्यंग्यतर्फ दिपक थापाको आर्कषक प्रस्तुति रहेको थियो । त्यस्तै, लाइभ तथा पप कन्सर्टतर्फ कृष्णा गुरुङ, याम नेपाली, सुचिलको प्रस्तुति रहेको छ ।
त्यस्तै, भोलि महोत्सवमा लोकदोहोरी कार्यक्रम तर्फ गायकहरु सुमन परियार, घनश्याम रिजाल, बालकृष्ण वाग्ले, नेत्र खड्का गायिकाहरु अस्मिता डल्लाकोटी, ईन्द्रा गुरुङ, सरिता सारुमगरलगायतका कलाकारहरुको प्रस्तुति रहने भएको छ । लाइभ कन्सर्टतर्फ उगेन, एल्भिन थापा, शुसन वागदासको प्रस्तुति रहने संयोजक ओझाले जानकारी दिए ।
महोत्सवको छैटौँ दिन आज तनहुँको शुक्ला गण्डकी नगरपालिकाको उद्योग वाणिज्य संघको टिमले अवलोकन गरेको थियो । निजी क्षेत्रको छाता संस्था लेखनाथ उद्योग वाणिज्य संघ र नेपाल उद्योग वाणिज्य महासंघले आयोजना गरेको महोत्सव पोखरा महानगरपालिकाको तालचोक डाडा नाकमा जारी छ ।
‘महोत्सव लेखनाथको संस्कृति, स्थानीय उत्पादन, विकास र सम्वृद्धि’ भन्ने मूल नाराका साथ सुरु भएको महोत्सवमा कुल ३३७ स्टलहरु रहेका छन् । ग्रामिण घरेलु प्रविधिको प्रदर्शनी र यहाँका पर्यटकीय स्थलको पहिचान गराउने उद्देश्यले आयोजना गरेको महोत्सवमा पर्यटकीय स्थलको पहिचान गराउने छुट्टै बेगनास तालको डेमो तयार गरि राखिएको छ, जुन दर्शकको आकर्षणको केन्द्र बनेको छ ।
यसका साथै महोत्सवमा हस्तकला, घरेलु उत्पादन, एग्रो प्रोडक्टहरुको प्रवर्द्धन सम्बन्धी स्टलहरु, मेसिन, अटो गार्मेन्ट, माटाका भाडा, फलामका औजार प्रदर्शनीमा राखिएका छन् । सगरमाथा इन्स्योरेन्स मुख्य प्रायोजक रहेको महोत्सवमा सहप्रायोजकमा राष्ट्रिय वाणिज्य बैंक, कृषि विकास बैंक, कामना सेवा विकास बैंकलगायत महोत्सव सफल बनाउन विभिन्न संघ संस्थाहरुले सहयोग गरिरहेका छन् ।
Comments are closed.