काठमाडौं । मनकामना केबलकारको टप स्टेसनको छेउमा सञ्चालनमा आउन लागेको रिसोर्टस बाइ मनकामना केबल कार प्रा.लि.ले रिसोर्ट परियोजनाको अन्तिम डिजाइन प्रस्तुत गरेको छ । मनकामना दर्शन गर्न आउने तथा घुम्न आउने आन्तरिक तथा बाह्य पर्यटकलाई आतिथ्यता प्रदान गर्ने लक्ष्यसहितसुविधा सम्पन्न रिसोर्ट सञ्चालनमा ल्याउन लागिएको हो ।
प्रालिको लगानीमा ४ तारे स्तरको रिसोर्ट निर्माणको काम सुरु भइसकेको छ । मनकामना क्षेत्रको मनमोहक परिदृश्यको बीचमा विरासत र आधुनिक डिजाइनलाई प्रस्तुत गर्दै रिसोर्टको डिजाइन गरिएको छ ।
इतिहास र समकालीन विलासिताको आनन्द दुवै खोज्ने पाहुनाहरूको लागि रिसोर्टले अद्वितीय वातावरण सृजना गर्ने विश्वास लिइएको छ । रिसोर्टले मनकामना क्षेत्रलाई थप आकर्षक पर्यटन केन्द्रको रुपमा महत्वपूर्ण योगदान पुर्याउन प्रालिले जनाएको छ ।
रिसोर्टमा ४० वटा कोठा हुनेछन् । मनकामना केबलकारको टप स्टेसन नजिकै बन्ने रिसोर्टमा स्विमिङ पुल, हेल्थ क्लव, स्पा लगायतको सेवा हुुनेछ । कार्यक्रम तथा सभा सेमिनारका लागि हलको सुविधासमेत हुने जनाइएको छ । मनकामना आउने स्वदेशी तथा विदेशी पर्यटक तथा दर्शनार्थीले स्तरीय होटलमा बस्न पाउने वातावरण रिसोर्टले तयार गर्ने प्रालिले जनाएको छ । प्रालिको स्वामित्वमा रहेको जग्गामा निर्माण हुने रिसोर्टमा ४० करोड भन्दा बढी लगानी हुने प्रालिले जनाएको छ ।
नेपालमा केबलकार परियोजनाको पहिलो प्रयोग मनकामना दर्शन प्रालिले गरेको हो । २५ वर्ष अगाडिबाट सञ्चालनमा आएको यो केबलकारले मनकामना दर्शनमा जाने दर्शनार्थीलाई सहज बनाएको छ ।
Comments are closed.