पोखरा । महिलाहरु मात्रै शेयर सदस्य रहेको पोखरा १४ को एक सहकारीले व्यवसायिक दूध उत्पादनमा लगानी विस्तारको आयोजनालाई अन्तिम रुप दिएको छ । भोट्ेचौतारास्थित समग्र महिला बहुउद्देश्यीय सहकारी संस्थाले दूध उत्पादन योजना विस्तार गर्न लागेको हो ।
पोखरा १४ मै करिब १० रोपनी जग्गा भाडामा लिएर सहकारीले २० वटा भैंसी र ५ वटा गाई पाल्न लागेको सहकारीका अध्यक्ष सविना अधिकारी क्षेत्रीले जानकारी दिईन् । उनका अनुसार सञ्चालन गर्न लागिएको दूध उत्पादन योजनामा १ करोड लगानी लाग्नेछ ।
नेपाल सरकार कृषि तथा पशुपन्छी विकास मन्त्रालय, ग्रामिण उद्यम तथा आर्थिक विकास आयोजनाको स्वञ्छ दूध उत्पादनको लागि व्यवसायिक गाईभैंसीपालन उपआयोजनाको ५० प्रतिशत अनुदान सहयोगमा यो कार्यक्रम हुन लागेको सहकारीका व्यवस्थापन धर्मराज केसीले जानकारी दिए ।
यो उपआयोजना अन्तर्गत सहकारीले २५ जना व्यवसायिक कृषक शेयर सदस्यबाट ५० लाख र आयोजनाबाट ५० लाख रुपैयाँ सङ्कलन गरेर दूध उत्पादन गर्न लागिएको हो । पोखरा १४ कै कदममार्गमा १० वर्षका लागि १० रोपनी जग्गा भाडामा लिएर दूध उत्पादन गरिने सहकारीकी सचिव ईन्दु अधिकारीले जानकारी दिईन् ।
सहकारीले वार्षिक ७२ हजार २ सय लिटर दुध उत्पादन गर्ने लक्ष्य लिएको छ । जसबाट ५४ लाख १५ हजार रुपैयाँ आम्दानी हुने अनुमान गरिएको छ । यसैगरी ४० हजार केजी कम्पोष्ट मल विक्रिबाट २० हजार, बाच्छाबाच्छी बेचेर २० हजार र पाडापाडी बेचेर १ लाख ५४ हजार रुपैयाँ आम्दानी हुने अनुमान सहकारीको छ । उक्त जग्गामा गाईभैसी पालनसँगै घाँस उत्पादन र ताजा तरकारी पनि उत्पादन गर्ने लक्ष्य लिइएको अध्यक्ष अधिकारीले बताईन् ।
सहकारीबाट सञ्चालित फर्मबाट ६ जनाले प्रत्यक्ष रोजगारी पाउनेछन् भने ३५ जनाले प्रत्यक्ष र ५७५ जनाले अप्रत्यक्ष लाभ लिनेछन् । सहकारीबाट उत्पादित दूध जिल्ला सहकारी संघ कास्कीले खरिद गर्ने भएको छ । सोही आयोजना सञ्चालन अघि सहकारीले सार्वजनिक सुनुवाई कार्यक्रम सम्पन्न गरेको छ । कार्यक्रममा सहकारीका शेयर सदस्य तथा फार्म सञ्चालन गर्दा प्रभाव पर्ने स्थानका सरोकारवालाको सहभागी थिए । कार्यक्रममा सहभागीले फार्म र अनुदानको निरन्तरता हुनुपर्ने, कारोवार पारदर्शी हुनुपर्ने, उप आयोजनाले अन्य व्यक्तिलाई नकारात्मक असर पर्न नहुने लगायतका विषयबस्तुमा आफ्ना भनाई राखेका थिए ।
सहकारीका सल्लाहकार तथा वडा नम्बर १४ का सदस्य तनुजा थापाले चौतारीमा बसेर बचत सङ्कलन गरी शुरु भएको सहकारीले अहिले एक करोडको आयोजना सञ्चालन गर्न सक्षम भएकोमा खुशी व्यक्त गरिन् । मन्त्रालयको ग्रामिण विकास तथा आर्थिक विकास आयोजनाका कृषिविज्ञ विष्णुदयाल सिंहले कृषि तथा पशुपालनलाई प्रोत्साहन गर्ने नेपाल सरकारको नीति अनुसार सहकारीलाई सहयोग गरिएको बताए । उनले उक्त अनुदान रकम फार्मलाई तीन किस्तामा दिने समेत प्रष्ट्याए । पशुधन खरिद गर्दा सार्वजनिक खरिद नियमावली अनुसार गर्न र अनिवार्य विमा समेत गर्न सहकारीलाई सुझाव दिएका छन् ।
सार्वजनिक सुनुवाई कार्यक्रममा जिल्ला सहकारी संघ कास्कीका महासचिव दीपक बाँस्तोलाले सहकारीले दूध खरिद गरी किसान र किसान समुहको दूध नबिक्ने चिन्ताको अन्त्य गरिदिएको बताए । उनले नेपाली किसानहरुले भोग्दै आएको मिल्क होलिडेको अन्त्य गर्न जिल्ला सहकारी संघ सधै लाग्ने बताए ।
मन्त्रालयको यो आयोजना नेपालका ३५ जिल्लाका १७१ पालिकामा सञ्चालित छ । कास्कीको पोखरा महानगरपालिका, मादी र रुपा गाउँपालिकामा यो आयोजना सञ्चालन भएको स्टार्टअप अनुदान सञ्चालन म्यानुअलमा उल्लेख छ । एसियन विकास बैंकको करिब १४ अर्ब २३ करोड ऋणमा यो योजना सञ्चालन भइरहेको छ ।
Comments are closed.