काठमाडौं । नेपाल प्रिमियर लिगको सहभागी टोली मध्येको एक लुम्बिनी लायन्स क्लबले आफ्नो लोगो सार्वजनिक गरेको छ ।
क्लबले आज आफ्नो सामाजिक सञ्जालमार्फत लोगो सार्वजनिक गरेको हो । नेपाली क्रिकेट टोलीका कप्तान समेत रहेका रोहित पौडेललाई लुम्बिनी लायन्सले मार्की खेलाडीका रुपमा साइन गरेको थियो ।
सार्वजनिक गरिएको नयाँ लोगोमा साहसी सिंहलाई प्रस्तुत गरिएको छ । जसले टिमको शक्ति, साहस र लिगमा वर्चस्व कायम गर्ने दृढतालाई प्रस्तुत गरेको छ । लुम्बिनी लायन्सको सारलाई समेट्न डिजाइन गरिएको यस लोगोले क्लबले एकता र दृढताको भावना झल्काउँछ ।
लुम्बिनी लायन्स क्लबका चेयरम्यान ईश्वर जीसीले भन्छन्, “यो लोगोले हाम्रो मैदानमा खेल्ने लुम्बिनी लायन्स टिम मात्र नभई सम्पूर्ण लुम्बिनीको गौरवलाई प्रतिनिधित्व गर्छ । एनपिएलको यस पहिलो संकरणमा नै जितको झण्डा गाड्न हामी आशावादी छौं ।”
नेपाल क्रिकेट संघ (क्यान) ले आयोजना गर्न लागेको नेपाल प्रिमियर लिग (एनपिएल) मा ८ वटा टिम समावेश छन् । लिग मङसिर १६ देखि काठमाडौंमा सुरु हुँदैछ ।
Comments are closed.