काठमाडौं । लर्डबुद्ध एजुकेशन फाउण्डेशन एल.बी.ई.एफ.ले आयोजना गरेको सूचना प्रविधि प्रदर्शनी भव्य रूपमा सम्पन्न भएको छ ।
स्नातक तहका छैठौँ तहमा आइटी अध्ययनरत विद्यार्थीले विकास गरेका सफ्टवेयर, एआई आधारित उपकरण, साइबर सुरक्षा सम्बन्धी प्रणाली, क्लाउड लगायतका विभिन्न ५२ वटा सिर्जनात्मक आविष्कारहरू प्रस्तुत गरिएको छ ।
लर्डबुद्ध एजुकेशन फाउण्डेशन परिसरमा भएको प्रदर्शनीको अवलोकन गर्दै नेपाली काँग्रेसका महामन्त्री तथा पूर्वमन्त्री गगन थापाले नेपाली विद्यार्थीहरू सूचना प्रविधिको क्षेत्रमा अब्बल रहेको प्रतिक्रिया दिए । विद्यार्थीले विकास गरेका आइटी सफ्टवेयरको व्यवसायीकरण र बजारीकरणका लागि सरकारसँग समन्वय गर्नुपर्ने थापाले बताए ।
सूचना प्रविधिको तीव्र गतिमा विकास र विस्तार भइरहेको अवस्थामा विभिन्न प्रकारका सफ्टवेयरहरू सरकारलाई नै आवश्यक पर्ने भएकाले नेपालमा आइटिको भविष्य उज्ज्वल रहेको थापाको भनाइ छ । नेपालमा दक्ष जनशक्ति उत्पादन गर्न आइटी क्षेत्रमा थप लगानी बढाउनुपर्ने उनी बताउँछन् ।
विद्यार्थीले विकास गरेको एआई प्रविधि, साइबर सेक्युरिटी, क्लाउड, तथा आई.ओ.टी प्रविधिमा अवलोकन कर्ताहरूको चासो देखिएको लर्ड बुद्ध एजुकेशन फाउण्डेशनका अध्यक्ष इ. पङ्कज जालानले बताए । फाउण्डेशनले विद्यार्थीको सिर्जनात्मक पक्षलाई अघि ल्याउने प्रयास गरेको अध्यक्ष जालान बताउँछन् । विद्यार्थीलाई आत्मविश्वासी र व्यावसायिक रूपमा सक्षम बनाउन आइटी प्रोजेक्ट एक्स्पो आयोजना गरिएको अध्यक्ष जालानको भनाइ छ ।
प्रदर्शनीमा विद्यार्थी, अभिभावक, शिक्षक तथा सूचना प्रविधिमा रुचि राख्ने विभिन्न क्षेत्रका व्यक्ति लगायत सहभागी प्रदर्शनीमा कलेजका विद्यार्थीले आर्टिफिसियल इन्टेलिजेन्स एआईमा आधारित प्रविधिको विकास, ह्याकिङबाट बच्ने सुरक्षात्मक प्रणाली, शैक्षिक व्यवस्थापन प्रणाली जस्ता नवीनतम प्रविधिको सफल प्रदर्शन गरेका हुन् ।
लर्डबुद्ध एजुकेशन फाउण्डेशनले हरेक वर्ष सिर्जनात्मक गतिविधिको माध्यमबाट विद्यार्थीलाई नयाँ खोज र प्रयोगमा प्रेरित गर्दै आएको छ । पछिल्लो प्रदर्शनीले पनि नेपालको आइटी शिक्षामा निहित क्षमतालाई उजागर गर्दै देशभित्रै नवप्रवर्तन गर्न सकिने सम्भावनालाई बलियो बनाएको छ ।
Comments are closed.