सुस्त अर्थतन्त्रलाई गति दिन ‘नवौँ नेपाल घरजग्गा तथा निर्माण प्रदर्शनी’

नेपाली अर्थतन्त्र हाल केही शिथिलता र ‘पर्ख र हेर’को अवस्थाबाट गुजरिरहेको छ । यस्तो संवेदनशील मोडमा अर्थतन्त्रको प्रमुख मेरुदण्डका रूपमा रहेको घरजग्गा तथा निर्माण क्षेत्रलाई पुनः चलायमान बनाउनु अपरिहार्य भइसकेको छ । घरजग्गा कारोबार सुस्ताउँदा त्यसको प्रत्यक्ष असर सिमेन्ट, डन्डी, पेन्ट, सेनेटरी, इन्जिनियरिङ कन्सल्टेन्सी, बैंक तथा वित्तीय संस्था र लाखौँको रोजगारीमा पर्ने गर्छ । यही व्यावसायिक मन्दीलाई तोड्दै अर्थतन्त्रमा नयाँ उत्साह भर्न र सुरक्षित आवासको सन्देश फैलाउन हामीले आगामी असोज १ देखि ४ गतेसम्म काठमाडौँको भृकुटीमण्डपमा ‘सिजी प्रपर्टिज÷सिजी होल्डिङ्स नवौँ नेपाल घरजग्गा तथा निर्माण प्रदर्शनी २०८३’ आयोजना गर्दैछौं ।

आर्थिक गतिविधि बढाउन एक्स्पोको भूमिका

घरजग्गा क्षेत्र केवल जग्गा वा घरको किनबेचमा मात्र सीमित छैन, यसले सिङ्गो अर्थतन्त्रमा ‘चेन इफेक्ट’ सिर्जना गर्छ । हाल बैंकिङ क्षेत्रमा तरलता सहज बन्दै गएको छ भने ब्याजदर पनि घट्दो क्रममा छ । यस्तो अनुकूल वातावरणमा लगानीकर्ता, निर्माण व्यवसायी, बैंक र आम उपभोक्तालाई एउटै मञ्चमा ल्याएर कारोबार सम्भव तुल्याउन यो प्रदर्शनीले सेतुको काम गर्नेछ ।
मेलामा सय भन्दा बढी स्टल रहनेछन् । सबै स्टल बुकिङ पनि भइसककेको छ । जहाँ काठमाडौँ उपत्यकाभित्र र बाहिरका साथै छिमेकी मुलुक भारतका प्रदर्शकहरूसमेत सहभागी हुनेछन् । संयुक्त आवास, अपार्टमेन्ट, जग्गा विकास आयोजना, निर्माण सामग्री, बैंक तथा वित्तीय संस्था, बिमा र रेनवाटर हार्भेस्टिङजस्ता आधुनिक प्रविधिहरू एकै छानामुनि उपलब्ध हुने भएकाले यसले बजारमा पुँजीको प्रवाह बढाउन र शिथिल अर्थतन्त्रलाई तीव्र गति दिन प्रत्यक्ष योगदान पु¥याउनेछ ।

सुरक्षित, विपद्–प्रतिरोधी र दिगो शहरीकरणमा जोड

‘सुरक्षित आवास, प्रत्येक नागरिकको अधिकार : ग्रिन डेभलपमेन्ट, द निड अफ द डे’ मूल नाराका साथ आयोजना हुन लागेको एक्स्पोले व्यापारलाई मात्र नभई चेतनामूलक अभियानलाई पनि प्राथमिकता दिएको छ । हालैका विनाशकारी बाढी–पहिरो र विपद्को पृष्ठभूमिमा हामीले सुरक्षित बस्ती विकास र विपद्–प्रतिरोधी पूर्वाधार निर्माणलाई विशेष जोड दिएका छौँ ।

बाढी–सुरक्षित घर कसरी बनाउने, नदी किनारभन्दा कति सुरक्षित दूरीमा निर्माण गर्ने र भूकम्प–प्रतिरोधी प्रविधि कसरी अपनाउने भन्ने विषयमा विज्ञहरूद्वारा सेमिनार तथा निःशुल्क परामर्श कक्षा सञ्चालन गरिनेछ। साथै, जलवायु परिवर्तन, सुरक्षित बस्ती पुनरुत्थान र सार्वजनिक–निजी साझेदारी (एएए) का विषयमा नीति निर्माणमा संलग्न अधिकारीहरूसँग गहन प्यानल छलफलसमेत आयोजना गरिनेछ ।

आधुनिक प्रविधि र सामाजिक उत्तरदायित्व

प्रदर्शनीलाई पूर्ण रूपमा वातावरणमैत्री र ‘पेपरलेस’ बनाउन डिजिटल स्ट्यान्डी, इलेक्ट्रोनिक्स किओस्क र भर्चुअल रियालिटी प्रविधिको प्रयोग गरिनेछ । मेलामा सस्तो, मध्यम र उच्चस्तरीय आवासका स्टलहरूसँगै निजामती कर्मचारीका लागि १ करोड ४० लाखदेखि १ करोड ५० लाख रुपैयाँसम्ममा घर निर्माण गर्ने सरकारी योजनाको मोडलसमेत प्रस्तुत गरिनेछ ।

व्यावसायिक गतिविधिसँगै हामीले सामाजिक उत्तरदायित्वलाई पनि उत्तिकै महत्व दिएका छौँ । आयोजकका तर्फबाट रसुवाका बाढीपीडित परिवारका लागि राहत सामग्री पठाइनुका साथै ‘प्रधानमन्त्री दैवी प्रकोप राहत कोष’ मा ३१ लाख रुपैयाँ नगद हस्तान्तरण भइसकेको छ । प्रदर्शनीका क्रममा निःशुल्क स्वास्थ्य शिविर, रक्तदान, बाढीपीडितका लागि निःशुल्क उपचार प्याकेज र नयाँ युवा उद्यमीहरूका लागि निःशुल्क तालिम तथा परामर्शसमेत प्रदान गरिनेछ ।

नेपाल चेम्बर अफ कमर्सको ७५औँ हिरक जयन्तीको अवसरमा नेपाल जग्गा तथा आवास विकास महासंघ र नेपाल जग्गा तथा आवास विकास संघ काठमाडौंको संयुक्त आयोजनामा हुन लागेको प्रदर्शनीलाई करिब ६५ हजारभन्दा बढी दर्शकले अवलोकन गर्ने हाम्रो अपेक्षा छ । वर्तमान अवस्थामा घरेलु वा आवासको सही छनोट गर्न, सुरक्षित लगानी सुनिश्चित गर्न र समग्र अर्थतन्त्रलाई चलायमान बनाउन यो एक्स्पो एउटा ऐतिहासिक साझा मञ्च बन्नेछ ।