पोखरा । नेपाल पत्रकार महासंघ गण्डकी प्रदेश समितिले ‘पत्रकार कल्याणकारी कोष’ स्थापना गर्ने भएको छ । प्रदेश समितिको शनिबारको भर्चुअल बैठकले रु एक करोडको कोष स्थापना गर्ने निर्णय गरेको हो ।
शुरुमा समिति पदाधिकारी, सल्लाहकार, प्रदेशबाट केन्द्रमा प्रतिनिधित्व गर्ने केन्द्रीय सदस्यबाट न्यूनतम रु १५ हजारका दरले जम्मा गरी कोष स्थापना गर्ने निर्णय भएको महासचिव गोविन्द सुवेदीले जानकारी दिए ।
कोषको सञ्चालन अध्यक्ष नारायण शर्मा नेतृत्वकै कार्यसमितिले गर्नेछ । कोषमार्फत प्राप्त ब्याज श्रमजीवी पत्रकारको हितमा खर्च हुनेछ । त्यसैगरी महासचिव सुवेदीका नेतृत्वमा सचिव यदुनाथ बञ्जारा र कैलाशबाबु श्रेष्ठ तथा कोषाध्यक्ष राजेन्द्र न्यौपाने सदस्य रहेको ‘पत्रकार कल्याणकारी कोष सञ्चालन कार्यविधि मस्यौदा समिति’ गठन गरिएको छ ।
पत्रकार महासंघका केन्द्रीय सदस्य त्रिभुवन पौडेलले श्रमजीवी पत्रकार लाभान्वित हुने हुँदा कोष स्थापनामा सबैले हातेमालो गर्नुपर्ने बताए । प्रदेश समिति सल्लाहकार दीपेन्द्र श्रेष्ठले पत्रकारको हितका लागि कोष स्थापना हुन सराहनीय भएको बताए । महासंघ प्रदेश समितिले कोरोना उपचारका क्रममा निधन भएका पत्रकार गणेश पौडेलप्रति श्रद्धाञ्जलि अर्पण गर्दै परिवारजनमा समवेदना प्रकट गरेको छ ।
Comments are closed.