ताप्लेजुङ । प्रतिकूल मौसमका कारण ३ महिनादेखि हवाई उडान हुन नसकेको सुकेटार विमानस्थलमा आजदेखि पुनः उडान सुरु भएको छ । मौसमको स्थितिमा क्रमिक सुधार भएसँगै उडान सुरु भएको हो ।
प्रतिकूल मौसमका कारण गएको जेठ ११ गतेयता उडान भएको थिएन । नेपाल वायु सेवा निगम ताप्लेजुङका प्रमुख नारायणकुमार कार्कीले ‘भिजिबिलिटी’ कम भएकाले उडान अवरुद्ध भए पनि अहिले मौसममा सुधार आएको र पर्यटकीय यामसमेत सुरु भएकाले काठमाडौं–ताप्लेजुङ–काठमाडौं उडान सुरु भएको जानकारी दिए ।
उनका अनुसार ३ महिनापछि भएको उडानमार्फत काठमाडौंबाट ४ यात्रु आएका छन् भने यहाँबाट २ यात्रु काठमाडौं गएका छन् । आगामी असोज १५ गतेसम्म साताको बुधबार एक दिन मात्र उडान तालिका राखिएको छ ।
त्यसपश्चात् भने सातामा तीन दिन उडान तालिका तय गरिने निगमको तयारी छ । यात्रुका लागि यहाँबाट काठमाडौंसम्म रु ९ हजार ४७५ शुल्क निर्धारण गरिएको छ । रासस
Comments are closed.