काठमाडौं । नेपाल टेलिकमले विद्यार्थीलाई लक्षित गर्दै एनटी फाइबर विद्यार्थी अफर सञ्चालनमा ल्याएको छ । टेलिकमले विसं २०५४ साल वा सोपछि जन्ममिति भएका विद्यार्थीका लागि सुपथ मूल्यमा उच्च गुणस्तरिय इन्टरनेट प्रदान गर्न एनटी फाइबर विद्यार्थी अफर सञ्चालनमा ल्याएको हो ।
आज नेपाल टेलिकम केन्द्रीय कार्यालयमा आयोजित कार्यक्रममा सञ्चार तथा सूचना प्रविधि मन्त्री जगदीश खरेलले सो अफरको शुभारम्भ गरेका हुन् । मन्त्री खरेलले आर्थिक रुपले सक्षमता नभएका विद्यार्थीका लागि सूचना प्रविधिमा पहुँच स्थापित गर्ने उद्देश्यले सहुलियतपूर्ण विशेष उपहार प्रदान गरेकोमा नेपाल टेलिकम परिवारलाई धन्यवाद दिए ।
फाइबर सेवाका ग्राहक वृद्धि गर्नका लागि बजारीकरणका उपायहरु अपनाउन अनुरोध गर्दै जनतालाई सुसूचित गर्न र सधैंभर सम्पर्क स्थापित गर्न टेलिकमले खेलेको भूमिका सराहनीय रहेको बताउँदै सुशासनको अनुभूति हुने गरी कार्य गर्न उनले निर्देशनसमेत दिएका छन् ।
कार्यक्रममा कम्पनी सञ्चालक समितिका अध्यक्ष, सञ्चार तथा सूचना प्रविधि सचिव राधिका अर्यालले नेपाल टेलिकम राष्ट्रको सञ्चारको रुपमा रहेकोले नाफा भन्दा पनि सेवालाई प्राथमिकतामा राखेर अगाडि बढेको उल्लेख गर्दै सेवाका साथसाथै राजश्व अभिवृद्धिलाई पनि लक्षित गरी आम्दानीको सम्भावनाका क्षेत्र पहिचान गरेर सेवा प्रदान गर्नुपर्नेमा जोड दिइन् ।
आजबाट सुरु भएको सो सेवा आउँदो माघ २२ गतेसम्म उपलब्ध हुनेछ । अफर अन्तर्गत करसहित रु. ४ हजार ९९९ मा ३० एमबीपीएस गतिको इन्टरनेट सेवा एक वर्षका लागि उपलब्ध गराइएको छ । जसमा साविक बमोजिमको जडान शुल्क रु. ५०० थप लाग्नेछ । अफरको साथमा विद्यार्थीले १ थान डुअल ब्याण्ड सिपिई र बढीमा १०० मिटर ड्रप फाइबर निःशुल्क प्राप्त गर्न सक्नेछन् ।
अफर लिनका लागि विद्यार्थीले सो अवधिभित्र १९८ मा सम्पर्क गरी डिमाण्ड पोर्टल तथा नजिकको नेपाल टेलिकमको कार्यालयमा उपस्थित भै आवेदन दिन सक्नेछन् । यस अफर अन्तर्गत उपलब्ध गराइएको एफटिटिएच प्याकेजको समयावधि समाप्त भए पश्चात् पुनः यसै प्याकेजमा नवीकरण गर्न नसकिने हुँदा सेवा नवीकरण गर्न चाहने विद्यार्थीले साविकमा उपलब्ध गराइएका प्याकेजहरु मध्येबाट आफ्नो आवश्यकता बमोजिमको कुनै एक प्याकेज छनौट गरी सेवा प्रयोगलाई निरन्तरता दिन सक्नेछन् ।
यस अफर अन्तर्गत एफटिटिएच सेवा खरिद गर्ने विद्यार्थीले प्याकेटल भ्यालिडिटी समाप्त भए पश्चात् साविकका अन्य प्याकेजहरुमा नवीकरण गर्न नचाहेमा शुरुमा उपलब्ध गराइएको सिपिई भने फिर्ता गर्नुपर्नेछ ।
अफर प्राप्त गर्नका लागि आवेदन फारमका साथ निम्नानुसारका कागजात अनिवार्य संलग्न गर्नुपर्नेछ :
- Valid Student ID Card
- स्पष्ट जन्ममिति खुल्ने प्रमाणपत्रको प्रतिलिपि
- नाबालिगको हकमा अभिभावकको प्रतिलिपि
जडान सम्बन्धी विस्तृत जानकारी कम्पनीको वेवसाइट www.ntc.net.np मार्फत तथा ग्राहक सेवाकेन्द्रको सम्पर्क नम्बर १९८ मा कल गरी प्राप्त गर्न सकिनेछ ।
Comments are closed.