मध्यविन्दु (नवलपरासी) । नवलपरासी (बर्दघाट सुस्ता पूर्व) दूध उत्पादनमा आत्मनिर्भर बनेको छ । जिल्लाको जनसङ्ख्याका आधारमा आवश्यकता भन्दा बढी दूध उत्पादन भई बिक्रिका लागि जिल्ला बाहिर पठाउन थालिएको छ ।
उत्पादित दूधको तथ्याङ्कका आधारमा नवलपरासी (बर्दघाट सुस्ता पूर्व) मा विगत ३ वर्षदेखि आत्मनिर्भर बनेको भेटेरिनरी अस्पताल तथा पशुसेवा विज्ञ केन्द्र प्रमुख ऋषभ गुरागाईँले बताए । “विश्व स्वास्थ्य सङ्गठनले विकास उन्मुख राष्ट्रमा एक व्यक्तिलाई एक वर्षमा ९१ लिटर दूध तय गरेको आधारमा जिल्लामा एक जनाका लागि १४६ लिटर दूध पुग्ने गरी उत्पादन भइरहेको छ”, उनले भने, “आर्थिक वर्ष २०८०/८१ मा नवलपरासी (बर्दघाट सुस्ता पूर्व)मा उत्पादन भएको दूधको आधारमा यहाँको कूल जनसङ्ख्यालाई आधार मान्दा एक जनालाई १४६ लिटर दूध पुग्ने देखिन्छ ।”
गत आवमा जिल्लामा ५५ हजार १७० मेट्रिक टन दूध उत्पादन भएको थियो । यसमध्ये गाईको दूध ३६ हजार ७९५ मेट्रिक टन उत्पादन भएको थियो । भैँसीको दूध १८ हजार ३७५ मेट्रिक टन उत्पादन भएको भेटेरिनरी अस्पताल तथा पशुसेवा विज्ञ केन्द्रको तथ्याङ्कमा उल्लेख छ । जिल्लामा खपत भएर बाँकी दूध काठमाडौं, पोखरा र चितवन बिक्रिका लागि पठाउने गरिएको प्रमुख गुरागाईँले जानकारी दिए । दूध उत्पादनमा जिल्ला आत्मनिर्भर भए पनि पछिल्लो ३ वर्षलाई तुलना गर्दा गत आवमा दूध उत्पादनमा कमी आएको छ ।
“आव २०७८/७९ मा ६१ हजार ६६४ मेट्रिक टन दूध उत्पादन भएको थियो । आव २०७९/८० मा थप वृद्धि भई ६२ हजार ४४६ मेट्रिक टन उत्पादन भएको छ”, प्रमुख गुरागाईँले भने, “आव २०८०/८१ मा विगतको तुलनामा उत्पादन घटेर ५५ हजार १७० मेट्रिक टन दूध उत्पादन भएको छ ।” गत वर्ष पशुमा फैलिएको लम्पी स्किन, आर्थिक मन्दी, पशु आहाराको मूल्यवृद्धि, दूध बिक्रीको अस्थिर बजार र बजारीकरण पूर्वाधारको अभावले दूध उत्पादनमा कमी आएको भेटेरिनरी अस्पताल तथा पशुसेवा विज्ञ केन्द्रको अनुमान छ ।
आव २०७९/८० को तुलनामा गत आवमा गाईभैँसी फार्म र गाईभैँसीको सङ्ख््यासमेत जिल्लामा मात्रामा घटेको छ । आव २०७९/८० मा गाई फार्म ५९८ र भैँसी फार्म ७५ गरी कुल ६७३ वटा फार्म रहेकामा गत आव २०८०/८१ मा गाई फार्म ४७३ र भैँसी फार्म ४७ गरी कूल ५२० वटा फार्म सञ्चालनमा छन् । अघिल्लो वर्षको तुलनामा जिल्लामा १५३ वटा फार्मको सङ्ख्या घटेको छ । रासस
Comments are closed.