तपाईंको बैंकिङ क्षेत्रको यात्रा कसरी सुरु भयो ? अहिलेसम्मको अनुभव कस्तो छ ?
मेरो बैंकिङ यात्रा सुरु भएको १९ वर्ष भयो । दिल्लीबाट एमबीए सकेपछि मैले नेपालको एउटा निजी कम्पनिमा बिदेशि एअरलाइन्सको ‘जीएसए’को लाईसेन्सको लागि करिब ५ महिना काम गरेँ, तर मेरो रुचि र करिअरको मुख्य जग बैंकिङ नै बन्यो । मैले साविकको नेपाल इन्भेष्टमेन्ट बैंकबाट आफ्नो यात्रा सुरु गरेँ । मैले ‘ग्रासरुट’ बाटै काम सिक्ने अवसर पाएँ । भैरहवाको लोन शाखाबाट सुरु भएको मेरो यात्रा वीरगन्ज, दरबारमार्ग हेडअफिस, ठमेल शाखा हुँदै बुटवलमा ब्रान्च म्यानेजरको जिम्मेवारीसम्म पुग्यो । त्यसपछि मैले सुदूरपश्चिम र गण्डकी प्रदेशको ‘प्रोभिन्स हेड’ भएर काम गर्ने अवसर पाएँ । मेगा बैंकसँगको मर्जरपछि काठमाडौँ फर्किएर हेडअफिसको रिस्क म्यानेजमेन्ट डिपार्टमेन्टामा क्रेडिट युनिट हेड भएर काम गरे, संगै पुल्चोक जस्ता मुख्य शाखाको नेतृत्व सम्हालेँ । अहिले विगत ५ महिनादेखि म रिलायन्स फाइनान्समा चिफ बिजनेस अफिसर भएर काम गरिरहेको छु । यो १९ वर्षको अवधिमा मैले नेपालका विभिन्न भूगोल र व्यावसायिक क्षेत्रलाई नजिकबाट बुझ्ने मौका पाएको छु ।
रिलायन्स फाइनान्सले अहिले कुन क्षेत्रलाई प्राथमिकता दिएर लगानी गरिरहेको छ ?
हामीले अहिले विशेषगरी साना तथा मझौला कर्जा (एसएमई लोन) मा जोड दिएका छौं । घरेलु उद्योग र साना व्यवसायमार्फत उद्यमी बन्न चाहनेहरू हाम्रो प्राथमिकतामा छन् । यसबाहेक गाडी कर्जा, घर कर्जा र जग्गा कर्जामा पनि हाम्रो लगानी भइरहेको छ । बजारको अवस्था अहिले केही कमजोर देखिए पनि हामीले कर्जा प्रवाहलाई रोकेका छैनौं, बरु वास्तविक व्यवसायीलाई छनोट गरेर लगानी गरिरहेका छौं ।
बजारमा धेरै वित्तीय संस्थाहरू छन्, ग्राहकले रिलायन्स फाइनान्स नै किन रोज्ने ?
हाम्रा केही विशिष्ट पाटाहरू छन् जसले हामीलाई अरूभन्दा फरक बनाउँछ । हामीकहाँ आउने ग्राहकले संस्थागत भन्दा पनि एउटा पारिवारिक वातावरणमा सेवा पाउनुहुन्छ । हाम्रो ‘टर्न अराउन्ड टाइम’ एकदमै छोटो छ । फाइल प्रक्रियामा आएको ३ दिनभित्रै हामी लोन स्वीकृत गर्ने प्रयास गर्छौं । अनावश्यक झन्झट वा मानसिक दबाब (ह्यारेसमेन्ट) दिने हाम्रो नीति छैन । हामी नेपालकै बढी चुक्ता पुँजी भएको राष्ट्यिस्तरको फाइनान्स कम्पनीभित्र पर्छौं । यो क्षमताले हामीलाई विकास बैंक वा वाणिज्य बैंकहरूसँग पनि प्रतिस्पर्धा गर्न सक्ने बनाएको छ ।
हाल संस्थाको वित्तीय अवस्था र पहुँच कस्तो छ ?
आजको दिनमा हामीसँग करिब १०.५० अर्ब रुपैयाँ निक्षेप छ भने ८.५० अर्ब रुपैयाँ बराबरको कर्जा लगानी छ । देशभर हाम्रो मुख्य कार्यालयसहित २१ वटा शाखा सञ्जाल छ र छिट्टै सुर्खेतमा नयाँ शाखा विस्तार गर्दैछौँ । बजारमा कर्जाको माग केही सुस्त देखिए पनि हाम्रा पुराना ग्राहकहरू हामीसँग सन्तुष्ट हुनुहुन्छ । एउटा ग्राहकले अर्को ग्राहकलाई रिफर गर्नु नै हाम्रो सेवाको सफलताको प्रमाण हो ।
रिलायन्स फाइनान्सको मुख्य उद्देश्य र भिजन के हो ?
हाम्रो मुख्य मन्त्र नै ‘वितीय सेवाको अर्को परिभाषा’ हो । हामी नेपालको वित्तीय क्षेत्रमा पहिलो रोजाइको फाइनान्स कम्पनी बन्न चाहन्छौं । हामी केवल नाफा कमाउन मात्र होइन, प्रविधिमैत्री सेवा प्रदान गर्दै समाज र अर्थतन्त्रमा सकारात्मक प्रभाव पार्ने ‘गुड सोसल सिटिजन’ का रूपमा चिनिन चाहन्छौं । यही उद्देश्य र मिसनमा हाम्रो यात्रा अगाडि बढिरहेको छ ।
अन्त्यमा के भन्न चाहनुहुन्छ ?
रिलायन्स फाइनान्ससँग जोडिनु भएका सम्पूर्ण सेवाग्राहीप्रति हामी आभारी छौं । आगामी दिनमा हामी आफूलाई अझै परिस्कृत र परिमार्जित गर्दै अझ उत्कृष्ट सेवा प्रदान गर्ने प्रतिबद्धता व्यक्त गर्दछौं । देशभर रहेका हाम्रा शाखाहरुमा खाता खोलेर कारोबार गर्न र हामीसँग जोडिन म सबैमा आग्रह गर्दछु ।
Comments are closed.